Asturnews Curso de community manager
 

21/02/2013
El Cabu Peñes celebra’l Día de la Llingua Materna presentando un llibru
 

Redacción

El llibru presentáu nuna esposición

Esti xueves 21 de febreru, na Casa La Escribana (Lluanco-Gozón), y con motivu del Día Internacional de la Llingua Materna, va presentase una campaña de normalización social del asturianu que la Mancomunidá d'El Cabu Peñes ta poniendo en marcha y que tien como oxetivu cimeru destacar la importancia de la familia como tresmisora xeneracional de la llingua materna, l'asturianu, como llingua vehicular nel usu comunicativu habitual de munches families.

El llibru, que va entregase dende los Rexistros d'Empadronamientu, dende’l propiu SNL, y nes Escueles de 0 a 3 añinos, (xunto con una carta del Presidente y del Vicepresidente de la Mancomunidá d'El Cabu Peñes) recueye información d’interés pa los padres y les madres. Esti material, col títulu "Llibru pa lo más piquiñino de casa", recueye la evolución del neñu y la neña dende que nacen hasta los 3 añinos: etapes de crecimientu, calendariu de vacunación, fiches personales, sitiu pa dalguna foto...

Pa ello, va presentase tamién un videu, fechu en collaboración colos CDTL de los dos Conceyos y qu’amuesa’l conteníu del llibru con un testu escritu y oral que mos va contando’l desarrollu personal d’una neña nos sos primeros tres añinos de vida y qu’ella mesma recuerda agora con 9 años. Esti videu va espardese nes redes sociales, páxines web y demás sistemes multimedia intentando asina difundir el trabayu de la meyor manera posible.

Al actu asistirán autoridaes de los dos Conceyos y la responsable del SNL.

Ye ésta una campaña coordinada dende'l SNL de la Mancomunidá a comuña col restu de Servicios de Normalización Llingüística d'Asturies y que recibe l'ayuda de la Conseyería d'Educación, Cultura y Deporte d'Asturies.


Compártilu

 
Otres Noticies
Mundu
Entrevista de la selmana
Sociedá
Educación
Música
Cine
Escéniques
Lliteratura
Conceyos
Plástiques
Política
Comunicación
Tecnoloxía
Fiestes
Mocedá
Hestoria
Cola ayuda de la Conseyería d´Educación, Cultura y Deporte del Principáu d´Asturies
© 2004 ASTURNEWS.com -
  |  Publicidá  |  Condiciones d'Usu  |  Información d'Empresa  |  Contacte con nós   |  RSS