Asturnews
 

14/02/2013
Cuando la güela de la Princesa d’Asturies recitaba n’asturianu
 

Redacción

Discos de les hermanes Álvarez del Valle

Menchu y Marisol Álvarez del Valle tán acabante ser gallardonaes col Premiu Nacional de Radio. Anguaño son más conocíes por ser, respectivamente, güela y tía güela de la Princesa d’Asturies, Letizia Ortiz. Pero ente los años cincuenta y noventa del sieglu pasáu fueron unes de les voces más conocíes de la radio n’Asturies y nel estáu. Primero tuvieron en Radio Asturies, n’Uviéu, y más tarde en Radio Nacional d’España, onde Menchu creo programes como “Coser y cantar” y “Rumbo a la fama”. Lo que poca xente sabe ye que dambes dos collaboraron a entamos de los setenta cola asociación Amigos del bable, grabando dellos discos onde recitaben a los autores clásicos de la lliteratura asturiana.

Nel añu 1969 José León Delestal y otres personalidaes del momentu creen “Amigos del Bable”, que nun ha confundise cola mui posterior y enemiga del asturianu “Amigos de los bables”. Na primer conferencia de presentación en sociedá de l'asociación, titulada “En defensa del Bable”, anunciábase’l propósitu de llanzar en plazu curtiu una campaña permanente en favor de la fala de los ástures al traviés d'una revitalización de la so poesía llírica y humorística, amás de la idea d'asoleyar una revista n'asturianu y otros materiales.

Ente aquellos planes, dalgunos nunca llevaos alantre, tuvo la colección “Discoteca Amigos del Bable”, qu’entamó en 1970 col andaluz Matias Prats y el barítonu asturianu Antonio Medio recitando “Andalucia y Asturies”, de Diego Terrero y Teodoro Cuesta, y tuvo a otres figures importantes del momentu como los actores José Suárez y Juan José Otegui.

En 1970, Marisol Álvarez del Valle, agora tía güela de la Princesa d’Asturies, ye la primera de la familia en collaborar recitando los poemes del llibru “Cancionines d’Asturies”, de Luis Aurelio. Esi mesmu añu, la güela de Letizia, a la que tovía-y quedaben dos años pa ñacer, participa nel discu “¡Bones Pascues!” onde sal “falando y cantando en bable”, xunto a los coros del Centru Asturianu de Madrid. Nesti discu recita poesíes navidiegues d’Enrique Gacía Rendueles, José Aniceto González y Teodoro Cuesta.

Meses más tarde Amigos del Bable asoleya una entrega nueva dedicada namás a Menchu Álvarez del Valle, na que la bisgüela de la que podría ser la futura reina d’España, recita poemes nun discu tituláu “La poesía bable canta a la muyer asturiana”. Neti volume inclúise “Añada pa’ que suañe maría”, de José León Delestal, “La canción de la madre”, d’Isidro Díez de la Torre, y “A les bones manzanines”, de Luis Aurelio, con órganu de fondu al cargu del maestru Casanova, y baxo la dirección artística de Delestal.

Una hestoria bien poco conocida de cuando la familia de la Príncesa d’Asturies collaboraba na promoción de la llingua asturiana.


Compártilu

 
Otres Noticies
Mundu
Entrevista de la selmana
Sociedá
Educación
Música
Cine
Escéniques
Lliteratura
Conceyos
Plástiques
Política
Comunicación
Tecnoloxía
Fiestes
Mocedá
Hestoria
Cola ayuda de la Conseyería d´Educación, Cultura y Deporte del Principáu d´Asturies
© 2004 ASTURNEWS.com -
  |  Publicidá  |  Condiciones d'Usu  |  Información d'Empresa  |  Contacte con nós   |  RSS