Inauguróse la octava Amuesa d’Obres d’Arte pola Oficialidá

14 febreru 11:02 2011 Imprimir

La sala d’esposiciones de la Casa Cultura de L’Infiestu (Piloña) foi l’escenariu escoyíu pa facer la presentación de la VIII Amuesa d’Obres d’Arte pola Oficialidá, que va tar abierta al públicu hasta’l 25 de febreru. A la inauguración asistieron l’alcalde del Conceyu Piloña, Camilo Montes Díaz; la tenienta d’alcaldía Rosa María Cano; Carlos Pulgar, portavoz del Conceyu Abiertu pola Oficialidá, José María Aladro, artista del conceyu Piloña y Ánxel Nava, comisariu de la esposición, qu’exerciendo como tal fizo un percorríu a toles persones ellí asistentes pela esposición, na que pudieron comprobar la gran calidá de les obres espuestes.

La VIII Amuesa d’Obres d’Arte pola Oficialidá ta formada poles creaciones artístiques donaes por autores asturianos pa sofitar les campañes del Conceyu Abiertu pola Oficialidá, plataforma cívica integrada por más de trescientes asociaciones culturales, vecinales, folclóriques, grupos de música, artistes de toa triba, deportistes, sindicatos, partíos políticos y persones particulares, y que tien como únicu oxetivu algamar la oficialidá de la llingua asturiana y del gallego-asturianu nel Estatutu d’Autonomía d’Asturies.

Nella puen atopase artistes de les cuatro últimes xeneraciones, dende veteranos autores de la talla y el prestixu de Bernardo Sanjurjo o Fernando Alba a otros muncho más mozos que formen parte del arte emerxente actual. Pa esta ocasión xuntáronse a la amuesa dalgunos de los artistes del propiu conceyu como’l fotógrafu José María Aladro o Sandra Arandajo.

L’Amuesa ye un interesante percorríu pel arte contemporaneu producíu n’Asturies, qu’abarca tanto escultura como pintura y fotografía, con gran variedá de técniques y soportes.

  Categories:
Loading Facebook Comments ...