Inaciu Iglesias presenta ‘El país que queremos’ nel espaciu Circus d’Uviéu

14 14:31 2018 Imprimir

Mañana xueves 15 de payares, a les 20 hores, l’escritor Inaciu Iglesias presenta nel espaciu Circus d’Uviéu ‘El país que queremos’, un ensayu nel que se pregunta sobro los problemes qu’afecten a la situación económica y política d’Asturies y propón soluciones que “siempres impliquen más participación y más valentía”.

Inaciu Iglesias lleva más de venticinco años escribiendo sobro la identidá, el pasáu, el presente y el futuru d’esta tierra,con un estilu claru que combina con aciertu un analís rigorosu y oxetivu de la realidá (dende la so óptica d’entamador y empresariu) con un pensamientu proactivo y serenu (presentando respuestes aplicables na práctica). Nos sos escritos demanda davezu la participación de toos. El discursu de Inaciu Iglesias escapa de cualquier demagoxa, prepotencia o pedantería, sigún amuesa la nota de prensa cola que se da anuncia de la presentación: “Bien al contrariu, ye precisu y didácticu: sintetiza realidaes complexes y opaques de la realidá llaboral y económico asturiana. Y, con ello, consigue superar posiciones pesimistes -fondiaes nel célebre ta too mui malu-, reivindicando que non tolos políticos (y les polítiques) son iguales”.

El país que queremos (Trabe, 2018) ye una obra na que, en testos curtios (dellos publicaos como artículos de prensa, otros como informes de trabayu), Inaciu Iglesias da les claves d’un país (el nuesu) poco dadu a pensar sobre sigo mesmu y demasiao avezáu a asumir proclames que lo esleen y facer absolutamente dependiente de les ayudes esteriores, minando asina les sos posibilidaes reales, afaciéndolo, y dexándolo en manos d’unos gobernantes (escoyíos por esta mesma sociedá, eso sí) demasiaes vegaes fondiaos na irrealidá. Frente a ello, Iglesias reivindica la valentía y l’acción en vegada del inmovilismu conformista y propón trabayar en soluciones reales que vaigan más allá del simple esperar a que les soluciones vengan de fora.

Pa la presentación de la so nueva publicación (que supon el númberu quince de la so trayectoria como escritor), Iglesias escoyó’l novedosu espaciu Circus By Borja G. Finat, un espaciu multifuncional únicu n’Asturies. L’actu va tener llugar a les 20 hores de mañana, xueves 15 de payares, y va promover la participación de los asistentes xuntu al autor.

Loading Facebook Comments ...