Inaciu Galán recoyó’l Premiu Fernán Coronas na romería de La Regalina

Inaciu Galán recoyó’l Premiu Fernán Coronas na romería de La Regalina
29 agostu 10:59 2016 Imprimir
La Sociedá Popular La Regalina de Cadavéu (Valdés) celebró esti domingu 28 d’agostu la folixa entamada pol Padre Galo alredor de la capiella y dientro d’estos actos entregábase’l Premiu Fernán Coronas de poesía, qu’esti añu recayó nel poemariu “Nes ruines de la nueche y les hores” del periodista y escritor Inaciu Galán (Xixón, 1986).

L’autor dixo unes pallabres na romería de La Regalina y participó del desfile col traxe’l país, como recueye la semeya.  Inaciu Galán, que vieno acabante asoleyar el so primer poemariu, “Tierra podre” (Ediciones Camelot, 2016), ye director de la revista Formientu, amás de presidente d’Iniciativa pol Asturianu.
El Premiu Fernán Coronas ye unu de los más prestixosos de los que s’otorguen a obres poétiques escrites n’asturianu y cunta ente los ganadores con autores como Miguel Rojo, Taresa Lorences, Ánxel Álvarez Llano, Héctor Pérez Iglesias o Pablo Rodríguez Medina. Convócase dende l’añu 1994 y tien una dotación de 900 euros, amás del compromisu d’edición de la obra ganadora.
Loading Facebook Comments ...