In Extremo, Avalanch y Vendaval, esti vienres nel Palaciu de Deportes de Xixón

El Palaciu de Deportes de Xixón va acoyer esti vienres 18 d’agostu a partir de les diez de la nueche un conciertu dedicáu al públicu heavy, nel que les bandes Avalanch y Vendaval van servir d’aperitivu a los alemanes In Extremo, grupu de cultu nel so país que sigue l’estilu inconfundible de Rammstein.

El grupu Avalanch llega a Xixón depues d’un añu repletu d’exitos, depues de publicar el so primer DVD, Cien Veces, el CD Mother Earth, destináu al públicu europeu y americanu; y el que yá se considera’l meyor discu de tola so carrera: El Hijo Pródigo.

Vendaval sacaba tamien l’añu pasáu ‘Mi otra mitad’, un nuevu trabayu nel que la banda formada nel añu 2002 por miembros del grupu Nörthwind amosábase más maduru, compactu y profesional, consolidándose asina como ún de los grupos heavy metal más importantes d’España.

Pero quiciás los más esperaos de la nueche sían los alemanes In Extremo. Consideraos un grupu de cultu nel país teutón, convierten los sos directos nun verdaderu espectáculu, nel que destaca la so fusión de la música folk, cola gaita como principal instrumentu, colos sones más puros del rock y del heavy.