Igualdá estrena’l documental “Muyeres d’Avilés en primer llínea”

“Muyeres en primer llínea frente al coronavirus”. Ye’l títulu del documental encargáu pola conceyalía d’Igualdá del Conceyu d’Avilés, que recueye’l testimoniu de 15 muyeres trabayadores que desempeñaron y desempeñen la so xera profesional nel caltenimientu de servicios esenciales na llucha contra la pandemia.

Una reconocencia y homenaxe, un agradecimientu colectivu que se va estrenar esti 8 de marzu, Día Internacional de la Muyer. L’estrenu va tener llugar a les 12 hores, al traviés de la canal de Youtube del Conceyu d’Avilés, (www.youtube.com/AyuntamientoAviles), la web www.aviles.es, según dende los perfiles municipales en redes sociales.

“Muyeres en primer llínea ” pon de manifiestu, en primer persona, cómo les muyeres son mayoría en munches de los oficios que convivieron col COVID-19 y engarráu de forma directa’l virus, en trabayos visibles y otros invisibilizados. Y cómo lacras estructurales, como la violencia de xéneru, amontáronse: el Centru Asesor de la Muyer d’Avilés tuvo qu’atender en 2020 un 20 per cientu más de casos.

El documental, con guión y llocución de les periodistes avilesines Yolanda de Luis y Concepción Landeira, respectivamente, ya imaxe y montaxe  al cargu d’Alfredo Sánchez Regueru (Fred Events), repasa les dificultaes que les 15 protagonistes atopáronse nel desempeñu de les sos funciones llaborales, dende’l trabayu social a la llimpieza, de la policía al comerciu de proximidá, de la educación a la sanidá, cola carga adicional feminizada de compaxinar lo llaboral cola conciliación familiar.

Los sos nomes son Cristina, Marta Cecilia, Bárbara, Carmen, Isabel, Teresa, Alejandra, Ana, Rosa Elena, Blanca, Nuria, Cercu, Cristina, Toñi y Mariví, en representación de toles muyeres que n’Avilés, y en tol planeta, desempeñaron trabayos fundamentales para’l sostenimientu de la vida diaria en tiempu de pandemia.

Más información