Portada Sociedá Iceta tendrá de xestionar un sector cultural afaráu pola pandemia

Iceta tendrá de xestionar un sector cultural afaráu pola pandemia

by redacción asturnews

El nuevu ministru de cultura, Miquel Iceta tomó posesión del so cargu esti llunes nun actu celebráu na see ministerial nel que recibió la cartera de manos del so predecesor, José Manuel Rodríguez Uribes, y nel que tamién tuvo presente la ministra de Facienda, María Jesús Montero.

L’hasta agora ministru de Política Territorial va pasar a ocupase de los problemes d’unu de los sectores más cutíos pola pandemia, con un bon puñáu de frentes abiertos, ente ellos el Plan de Recuperación, Tresformamientu y Resiliencia o l’Estatutu del Artista, según intentar recuperar l’enfotu de les distintes industries culturales tres la xestión de Uribes mientres el so añu y mediu nel cargu, que foi duramente criticada.

“Tócame rematar el to trabayu en munchos tarrenes. Nun pudisti faer tou lo que queríes por cuenta de la pandemia”, dixo Iceta refiriéndose al so predecesor y a les sos xeres ensin entamar, como la Llei de Mecenalgu, el hub audiovisual, los incentivos fiscales y el sofitu a creadores. Amás, ente les sos funciones va tar la propuesta y execución de la política del Gobiernu en materia de promoción, protección y espardimientu del patrimoniu históricu español, de los museos estatales, de les artes, del llibru, de la llectura y la creación lliteraria, de les actividaes cinematográficu y audiovisual, según l’impulsu de les acciones de cooperación cultural tantu nel nuesu país como nel estranxeru.

Coles mesmes, correspuénde-y la propuesta y execución de la política del Gobiernu en materia de deporte, sobro lo que declaró que va intentar fomentar la práctica deportiva dende les escueles, que va aguiyar el deporte femenino y va lluchar contra la homofobia. Unu de los sos primeros actos oficiales, va ser precisamente allegar a los Xuegos Olímpicos de Tokio.

Miquel Iceta, al igual que Uribes, nun tien esperiencia nel sector, como sí la tenía José Guirao, el primeru de los ministros de la era Sánchez y el que menos tiempu tuvo nel cargu a pesar de ser de los más valoraos en toles disciplines culturales que engloba el ministeriu.

Nel so discursu Iceta comprometióse a dar un anováu impulsu a la cultura y el deporte por qu’España pase de ser una potencia a una superpotencia nel mundu.

Tamién te podria gustar