IAS critica a Areces por nun falar n’asturianu nel Comité de les Rexones

El portavoz d’Izquierda Asturiana (IAS), Ignaciu Llope, afirmó ayeri que l’usu del restu de les llingües del estáu nel marcu del Comite de les Rexones en Bruseles dexó n’evidencia al gobiernu asturianu y recordó qu’esti casu ye ún más de la “metanormalización” na que se basa la so llinia d’actuación en materia llingüística, calificando la situación d'”insostenible”.

Na última sesión del Comite de les Rexones d’ayeri los representantes de los gobiernos de Cataluña, Galicia, Valencia y Euskadi usaron les llingües de les sos comunidaes autónomes, mentes que’l presidente del Principáu, ente les preguntes de los periodistes sobre esta tema, llimitóse a dicir que “l’idioma de comunicación d’España ye’l castellán y l’usu de los tres idiomes cooficiales veolu como un fechu positivu de sensibilidá y reconocimientu y por supuesto arguyosu tamien de defender l’usu y promoción del bable que ye lo que diz el nuestru estatutu”.

Énte estes declaraciones d’Areces, el portavoz de la Dirección Nacional d’Izquierda Asturiana (IAS), Ignaciu Llope, siñaló que’l “nuestru presidente, como yera previsible y pesie los consabíos planes de normalización, lleis d’usu, promociones varies, movilizaciones sociales y encuestes sociollingüístiques qu’amuesen una clara demanda, nun se dignó a utilizar la llingua asturiana nin siquier de forma simbólica”.

Pa Llope, la situación creada en Bruseles pol presidente “ye insostenible” y calificó estes afirmaciones como “burlla macabra”, porque en principiu dicen defender la llingua pero que dempues nun van acompañaos de fechos riales. Llope afirmó qu’“esti ye ún más de los actos de “metanormalización” na que se basa la llinia d’actuación d’esti gobiernu en materia llingüística”, yá que fálase de normalización pero nun se normaliza l’asturianu, acusando esta promoción llingüística de ser “un gastu de cara a la galería”.