IAS califica de ‘timu’ y ‘estafa’ la xornada sobre normalización nos conceyos d’Avilés

09 ochobre 23:19 2005 Imprimir

Izquierda Asturiana (IAS) afirma nun comunicáu que xornaes como la que se celebró esti sábadu 8 n’Avilés sobre normalización na rede municipal d’oficines de política llingüística constituyen “un timu y una estafa” a los ciudadanos, porque pa esta formación “utilízaee el dinero de los contribuyentes non n’aplicar medíes que creen derechos o que modifiquen les práctiques de la administración, sinón n’ actuaciones efímeres” que nun inciden “na normalización real de la llingua asturiana”.

IAS cuenta que “nun esiste voluntá política” en materia normalizadora per parte de los conceyos y que xornaes como la celebrada n’Avilés “namás valen pa que ‘los del bable’ se xunten, gasten el dinero en vere les cares unos a otros y falen del sexu de los ánxeles”.

La formación nacionalista pide-y al gobiernu asturianu y al avilesín que destinen el presupuestu de política llingüística “n’actuaciones realmente normalizadores, non en facese propaganda y permitir que varios amigos se saquen fotos de familia, pa testificar lo obvio, que la llingua asturiana ta morriendo, precisamente pola ausencia de voluntá política, enmascarada o non tres la propaganda institucional y tres redes, xornaes o conciertos”.

  Categories:
Loading Facebook Comments ...