Portada Conceyos Hosteleros del cascu antiguu d’Uviéu abren la Ruta del vermú

Hosteleros del cascu antiguu d’Uviéu abren la Ruta del vermú

by redacción asturnews

L’Asociación d’Hosteleros del Uviéu Antiguu, dispuesta a dinamizar la zona, va poner en marcha iniciatives d’equí a final d’añu pa potenciar el vermú y dinamizar el sector en tiempu de pandemia cola ‘Ruta del Vermut’ como primer propuesta, na que 39 establecimientos van ufiertar un pinchu con cada consumición.

La iniciativa presentose’l vienres na Plaza de Trascorrales, col conceyal de Turismu, Hostelería y Congresos, Alfredo García Quintana; el presdiente d’Hostelería d’Asturies, José Luis A. Almeida y el presidente de l’Asociación, Castu Fano. Y empezó esa mesma tarde a les 17 hores, en Trascorrales, con una ‘master class’. Trátase, según el conceyal García Quintana, de “una primer idea que va sirvir pa dinamizar un poco la zona”.

Fano, sorrayó qu’esti ye’l primeru de dellos proyectos hasta final d’añu que van sirvir pa conocer la gastronomía asturiana y esta zona de la ciudá, lo que pretende potenciar l’ociu diurnu. “El contestu ye bien complicáu y vamos tener que ser más creativos y afaenos a una redolada cambiante”, indicó.

El responsable municipal de Turismu aseguró, amás, que la campaña de promoción de la ciudá ‘Uviéu Saludablemente’ cumplió los oxetivos marcaos de “salvar la temporada”. Y anunció qu’el eslogan va tener más percorríu dientro de futures campañes que van tener como exa’l Prerrománicu, el Camín de Santiago o’l Cascu Históricu y que pretenden ayudar a un sector “que sufrió en primer persona les consecuencies económiques de la pandemia”.

Tamién te podria gustar