Homenaxe a los milicianos asturianos en Bizkaia

09 xunu 10:47 2014 Imprimir

Andecha Astur participará un añu más nel homenaxe que tendrá llugar el prósimu 22 de xunu, nel conceyu de Larrabetzu (Bizkaia), onde en 1937 un continxente de milicianos asturianos defendieron esti pueblu frente al avance de les tropes facistes. Tres la rotura del frente poles tropes franquistes, un númberu indetermináu d0estos milicianos foren sosprendíos y muertos nesti llugar, siendo dempués entierraos nuna o varies de les trincheres qu’había.

N’alcordanza de toos ellos, pa honrar la so memoria y la solidaridá na llucha anti-facista, el prósimu domingu 22 de xunu, y por tercer añu consecutivu cellebraráse un homenaxe en Larrabetzu un homenaxe a esos asturianos, nel qu’Andecha Astur participará activamente.

La xornada escomenzará con una recepción na Herriko Plaza a les presones que dende Asturies aportamos a tomar parte nel actu, ente los que tarán la banda de gaiteros “Turruxón” que xunto a los trikitrilaris de Larrabetzu entamarán musicalmente el dii con una “kalejira”.

Darréu, en Bolumburu, el llugar onde tan entierraos los restos de los milicianos asturianos y onde se colocó l’añu pasáu un monolitu nel so honor, rializaráse un Actu d’Alcordanza, con estremaes intervenciones.

Andecha Astur anima a participar nesti actu y fadrá por tresnar un autocar. Los interesaos puen atopar más información nos llocales de la organización y al traviés del mail andechainfoarrobagmail.com

  Categories:
Loading Facebook Comments ...