Homenaxe a Los Berrones en Tolivia

Homenaxe a Los Berrones en Tolivia
29 setiembre 18:12 2015 Imprimir

Una ventena de músicos y bandes de too tipu, dende la banda de gaites Lakadarma a los  Stukas o Johnny Penicilina y los Frixuelos Eléctricos, Pablo Moro o Toli Morilla, van facer homenaxe esti sábadu en Tolivia a los 30 años de música que lleven ufriendo Los Berrones.

La cita ye dende les seis de la tarde en Tolivia, na carpa que se va llantar nel pueblu y con autobuses de baldre que van salir dende Llaviana. L’homenaxe fainlu los vecinos de los inventores del agro-rock, pero también la escena musical asturiana, dende mozos como Jandrix Band a veteranos como Luis Núñez y los Folgazanes.

Los Berrones agotaron yá hai dos selmanes la primer tanda d’entraes pa l conciertu que tienen programáu en Madrid nel que Chivi va abrir la hestórica nueche. La gran expectación qu’hai pa ver a Los Berrones na capital, amuesase en que tan yá agotaes les 200 entraes de la ufierta de llanzamientu pal conciertu que los asturianos van ufrir dientro de dos meses, el 28 de payares, na Sala Penélope de Madrid. Los creadores del agro-rock van tener como artista convidáu nesti hestóricu show al conocíu pornoautor Chivi, d’esta manera desvélase’l cartelu definitivu del eventu pasando a costar les entraes anticipaes, que tán vendiéndose yá a bon ritmu, 10 euros y si lleguen a taquilla 13.

La banda de Tolivia, Los Berrones, foron los ganadores en 2006 na categoría de la meyor canción n’asturianu nos premios de l’Academia de la Música, col tema ‘Fai deporte’, grabáu en collaboración con un grupu de deportistes asturianos pa una gala benefica a inciativa d’Oviedo TV. Los Berrones, víen reconocida d’esta manera una trayectoria qu’empezó a mediaos de los años 80 y una reaparición nel añu 2003 cuando sacaben el discu ‘República Independiente de Tolivia’.  Nesti ‘resurdimientu’, Los Berrones enfilaben esi añu col envís de rentabilizar el so ésitu de ventes y protagonizar una cifra de recitales por sales como Salka Azkena de Bilbao (22 de xineru), el llocal madrilanu El Sol (día 27) y na sala Glam de Lleón (29 de xineru).

El responsable de la reedición de la popularidá hai 10 años de Los Berrones yera’l discu que la banda grabó en directu n’agostu d’aquel añu na playa xixonesa de Poniente, al qu’acudieron miles de persones. Con anterioridá, el grupu grabó otros siete trabayos dende’l so estrenu nos estudios, en 1989.

L’entamu del grupu foi en 1988, cuando presentáronse a un concursu de maquetes de los 40 principales n’Asturies. Quedaron finalistes y como premiu pudieron grabar un single con dos canciones que batió tilos récords de ventes n’Asturies y facilitó que sacaren después el discu “Voi dicítelo” en 1989 col tema “Nun yes tú” como estrella.

Depués grabaríen en Madrid el discu “Si rompe, que rompa” y hasta 1993 grabaríen dos discos más. Dende esi añu tdescansaríen hata que nel 1998 tornaben con “Da-y fuerte”. En 1999, con motivu del décimu aniversariu del so primer álbum, editaron el recopilatoriu “10 años berrando”.

  Article "tagged" as:
  Categories:
Loading Facebook Comments ...