Hollywood plantega substituir la estrella de Donald Trump pola de Carrie Fisher

10 agostu 10:19 2018 Imprimir

El Paséu de la Fama de Hollywood ta por camudar una de les sos estrelles más famoses y al empar polémiques. Tratase de la baldosa que fai referencia al actual presidente de los Estaos Xuníos, Donald Trump, que quieren camudar pola de Carrie Fisher.

El pasáu llunes, el Conseyu de la Ciudá de West Hollywood votó por unanimidá esaniciar la estrella de Trump  por cuenta del so “esmolecedor tratu a les muyeres y otros de los sos actos”. El resolvimientu encamienta asina a la ciudá de Los Ánxeles y a la Cámara de Comerciu de Hollywood a retirar la estrella, pero “non porque Donald Trump sía conservador o republicanu”, esclarió l’alcalde interín de West Hollywood, John D’Amico, en declaraciones TheWrap. “Tener una estrella nel Paséu de la Fama de Hollywood ye un honor. Cuando unu fai de menos y ataca a les minoríes, los inmigrantes, les persones con discapacidáes o les muyeres, l’honor yá nun esiste”, dixo’l representante.

La estrella de Trump yá foi oxetu d’actos vandálicos en repitíes ocasiones, desque empezó la carrera pola presidencia del país en 2016. El mes pasáu inclusive foi atacada con un picu d’obra que dexó un furacu considerable nel llugar,  ente qu’a primeros d’añu foi pintada con una esvástica nazi. Sicasí, el Conseyu de la Ciudá de West Hollywood argumentó nun comunicáu que’l Paséu de la Fama sigue siendo “propiedá de la Ciudá de Los Ánxeles” y que la ciudá ye quien tien la responsabilidá final de les condiciones y el caltenimientu del Paséu de la Fama”.

En casu de que fructificasen les demandes del Conseyu de la Ciudá de West Hollywood, Mark Hamill yá tien la perfecta sustituta pa Donald Trump. L’actor de la saga Star Wars suxiere reemplazar la estrella del actual presidente pola de la so amiga y compañera Carrie Fisher, finada por causa de un paru cardiaco a finales de 2016.

  Categories: