Hey Honcho and The Aftermaths ponen el puntu y final al ciclu Factoría Sound 2018

Hey Honcho and The Aftermaths ponen el puntu y final al ciclu Factoría Sound 2018
04 avientu 17:30 2018 Imprimir

La banda asturiana Hey Honcho and The Aftermaths ponen el puntu y final al ciclu Factoría Sound 2018 y van treslladar al públicu tol rock, punk y el trash-garaxe arramáu nel so álbum “Chico Purito!”. Les entraes pueden adquirise a un preciu de 8 euros en vienta antemanada, y 10 nel día del conciertu, esti miércoles 5 d’avientu.

Factoría Sound pon el puntu y final al 2018 col últimu conciertu del ciclu. Los encargaos d’echar el telón hasta’l 2019 van ser asturianos, el punk rock de garaxe de Hey Honcho and The Aftermaths. Va Tener llugar el miércoles 5 d’avientu, a les 21 hores, nel espaciu escénicu de la Factoría Cultural d’Avilés. Les entraes, a un preciu de 8 euros (10 el día del conciertu), pueden adquirise nos calces habituales, les taquilles de la Casa de Cultura, y de forma telemática, al traviés d’Internet na web https://entraes.liberbank.es/palaciovaldes.

Col impulsu de la conceyalía de Cultura, Factoría Sound asitió a Avilés como referencia musical nel norte d’España, cita ineludible pa bandes de toa Europa que s’atopen de xira per España. Y son los asturianos Hey Honcho and The Aftermaths quien van tener l’honor d’echar el zarru al ciclu por anguaño.

La banda llega a Avilés col so últimu álbum, “Chico Purito!”. Un trabayu nel qu’entornen la so devoción pol punk, el rock and roll y el trash-garaxe más cañeros. Abondo ye que, el cuartetu conformáu por Diego Manfredo a la guitarra, Von Gustopher a les voces, Dani Thunder a la batería, y Héctor Castañón al baxu, se curtió en grupos señeros de la escena asturiana, como Ass Draggers, Amon Ra o Electric Children.

Aftermaths grabó les 12 temes propies, más una versión de la banda Dead Boys, que conformen “Chico Purito!”, nuna sola sesión, nel Ovni Estudiu de Llanera, cola producción del neoyorkino Mike Mariconda. Y integráronse na discográfica alemana Hound Gawd!, que cunta sol so mantu con formaciones como The Fuzztones, The Raymen, o The Legendary Shack Shakers.

La so música de cabecera ye’l punk rock de garaxe, con influencia de DMZ, Heretics o Turbonegro. En “Chico Purito!”, amás de la versión de “All this and more” de los míticos Dead Boys, solo trés composiciones nun son nueves, “Dull Boy”, “Blackburn Inn” y “Bossman”, el restu, como “Skinny Tee”, Communication” o Coup The Grace”, nacieron para integrase nel álbum d’una banda que destaca pol so directu enerxéticu y cargáu d’actitú.

  Categories: