Portada Escéniques ‘Hestoria d’una grana’trai a la Ópera d’Uviéu la esencia del musical infantil

‘Hestoria d’una grana’trai a la Ópera d’Uviéu la esencia del musical infantil

by redacción asturnews

Esti próximu sábadu va tener llugar la representación del musical infantil ‘Hestoria d’una grana’ de la Ópera d’Uviéu. L’espectáculu foi presentáu esta selmana en rueda de prensa pol conceyal de Cultura, Roberto Sánchez Ramos, que tuvo acompañáu pol director artísticu de la Ópera d’Uviéu, Javier Menéndez Álvarez, y el director de la Fundación EDP, empresa patrocinadora, Ángel Moraleda Piñuela.

“Ye un proyectu pedagóxicu” que pretenden que “fomente l’afición musical de los más pequenos, el desenvolvimientu de creatividá, el desenvolvimientu d’imaxinación,…” señaló’l conceyal. Tratase de “una bella fábula sobro la naturaleza” qu’enceta la tema del cuidu del mediu ambiente, “una tema bien importante nestos tiempos” como indicó Ángel Moraleda, y qu’esperen qu’ayude a los neños “a desenvolver valores de compromisu con temes como ésti”. La obra, d’una duración averada de 50 minutos, cunta “la hestoria d’una grana y les vicisitúes qu’ésta traviesa pa crecer” esplicó Javier Menéndez, acompañada pola música de dos pianos.

La función va ser el sábadu día 12 de xineru en dos sesiones, a les 18 y a les 20 hores, nel Teatru Filarmónica. Les localidaes tienen un preciu ente 10 y 12 euros y pueden adquirise na páxina web de vienta d’entraes de Ópera Uviéu, Operaoviedo.koobin.com, o na Taquilla del Teatru Campoamor.

Tamién te podria gustar