Henar Fernández Clavel vuelve ganar el “Grand Prize Virtuosu International”

Henar Fernández Clavel vuelve ganar el “Grand Prize Virtuosu International”
10 09:03 2020 Imprimir

La moza avilesina Henar Fernández Clavel, alumna de pianu del Conservatorio Municipal Profesional Julián Orbón, volvió ser escoyida pol xuráu del prestixosu “Grand Prize Virtuosu International Music”, un concursu abiertu a músicos de toles especialidaes instrumentales, edaes y nacionalidaes.

Gracies a la so interpretación de la Sonata Patética de Beethoven, grabada en vídeu y unviada al xuráu acordies con les bases, l’alumna del Conservatorio avilesín llogró’l primer premiu na categoría “Intermediate”, na que compiten intérpretes d’ente 13 y 15 años d’edá.

Este ye’l mesmu galardón que Henar Fernández Clavel yá llogró na anterior edición del “Grand Prize Virtuosu International Music”, celebráu nel mes d’agostu en Salzburgo. Nesta ocasión, la nueva pianista va poder participar nel conciertu que la organización va celebrar el 9 d’avientu con tolos premiaos y premiaes na casa natal de Beethoven, asitiada na ciudá alemana de Bonn.

El pasáu mes de marzu, Henar actuó nel Carnegie Hall de Nueva York, onde recibió’l “Golden Classical Music Awards”, dempués de que’l xuráu d’esti galardón de fama mundial valorara la so “capacidá y calidá interpretativa” de la Danza ritual del fueu”, de Manuel de Falla.

Pela so parte, la xixonesa Lucía Baladrón Rodríguez, ex-alumna de violonchelu del Conservatorio Municipal Profesional Julián Orbón, foi premiada nos Premios Estraordinarios del alumnáu d’Enseñances Artístiques Profesionales correspondientes al añu 2020.

Dichu premiu otorga’l derechu de poder participar nos Premios Nacionales d’Enseñances Artístiques que convoque’l Ministeriu d’Educación, Cultura y Deporte pal mesmu periodu, xuntu cola concesión d’un diploma pa cada intérprete escoyíu.

En mayu de 2019, siendo alumna del profesor Alberto Gorrochategui Blanco nel Conservatorio Municipal Julián Orbón, Lucía Baladrón foi galardonada nel III Concursu Soncello pa Mozos Violonchelistes que se celebró nel Conservatorio Profesional de Música d’A Coruña.

La moza violonchelista foi tamién premiada en 2018 nel Concursu Intercentros Melómanu, al qu’asistió como representante del Principáu d’Asturies en siendo escoyida na fase rexonal

  Categories: