Portada Conceyos Grau quier recordar la famosa enllenada del añu 1921 con un monumentu

Grau quier recordar la famosa enllenada del añu 1921 con un monumentu

by asturnet

La nueche del 20 al 21 de setiembre de 1921 ye una fecha entá recordada en Grau. Nun paró de llover dende los diez de la nueche hasta los cinco de la madrugada, lo que provocó que s’anubriera la vega y se desbordare’l Ríu Martín dende la media. Esti pequeñu regatu, que malapenes baxa agua demientres el branu, convirtióse nuna gran riega qu’abasnaba tolo que tenía per delantre. La fuercia de les agües foi tal que provocó’l fundimientu de delles cases próximes, una d’elles el xalé de Valentín Sarasola “Tumballobos” y el fallecimientu d’una vecina.

La prensa nacional y estatal fízose ecu de los sucesos de Grau, créase una Xunta de Socorru pa recaldar fondos pro-damnificaos. En payares d’esi mesmu añu 1921, el Ministeriu de la Gobernación y robláu pol rei Alfonso XIII, y como atención a la desgracia sufierta polos habitantes de Grau concédese-y a la villa’l títulu de siempres benéfica, y al so Conceyu’l tratamientu d’Ilustrísimu.

Coincidiendo col 90 aniversariu d’esta efeméride, la Conceyalía de Cultura del Conceyu de Grau y el Círculu d’Estudios Pramarenses convoquen pal martes día 20 de setiembre a les 14 hores y na Sala Polivalente de la Casa de Cultura de Grau una rueda de prensa abierta tamién al públicu polo xeneral pa presentar un proyectu de monumentu n’alcordanza d’esta enllenada y bien rellacionáu tamién col xalé de “Tumballobos”.

Nel actu intevendrán la Conceyala de Cultura Mª Victoria Fernández, José Luís Arguelles García como autor d’un estudiu sobre la enllenada y el mentáu xalé, y Emilio Argüelles en representación del Círculu d’Estudios Pramarenses.

Tamién te podria gustar