Grau organiza una ruta etnográfica per Salcéu pa Setiembre

29 agostu 11:30 2018 Imprimir

El Serviciu de Normalización Llingüística del conceyu de Grau organiza unas xornadas que llevan por nome Asturianu en branu, que tienen como fin crear una rede constante d’actividades culturales n’asturianu a lo llargo del branu y como remate entama una ruta etnográfica per Salcéu pa Setiembre.

“Estas xornadas nacen de la petición de las personas qu’asistieron a los cursos d’asturianu que se fixeron nel conceyu nos anteriores meses ya del interés pola cultura asturiana de los moscones qu’asisten de manera regular a los eventos organizaos dende l’área de Cultura de Grau”, sigún despliquen na convocatoria de la ruta.

El día 6 de setiembre a las 16:00 horas va facese una ruta etnográfica en coche que va salir de la Casa la Cultura de Grau. D’esta vuelta va organizase una pequeña caravana de coches que va recorrer la parte sur del conceyu moscón con dellas paradas culturamente importantes, de las que se van ocupar Xosé Ambás y Ramsés Ilesies mediante esplicaciones etnográficas (llingüísticas, paisaxísticas, históricas, sociales, musicales ya arquitectónicas). Por ello llimítase’l númeru de xente que pue participar na actividá a 20 personas, poniendo un plazu d’inscripción por teléfonu d’una semana (985 952 229: martes ya miércoles de 9:00 a 14:00).

La primer cita foi’l día 12 de xuliu ya l’encargáu d’abrir el programa foi Xandru González Fernández, cocineiru de la Escuela Pública Bernardo Gurdiel, que falóu de la influyencia del Mercáu de Grau nel queisu d’afuega’l pitu. La outra cita braniega va ser a mediaos de setiembre ya va centrase nun recital poéticu polas cayes de Grau.

Estas xornadas son de baldre y tán dirixidas a la población en xeneral, pues tienen carácter divulgativu. El Serviciu de Normalización Llingüística de Grau, con estas actividades de branu, sigue’l camín d’eventos qu’empezóu hai unos meses nel conceyu ya márcase l’oxetivu de siguir funcionando próximamente.

Loading Facebook Comments ...