Portada Conceyos Grau lleva al plenu del martes “las ordenazas” del asturianu

Grau lleva al plenu del martes “las ordenazas” del asturianu

by redacción asturnews
Servicios de normalización

El grupu municipal d’Izquierda Xunida del conceyu de Grau, qu’actualmente gobierna con mayoría absoluta nel territoriu moscón, va llevar esti próximu martes 23 d’octubre a plenu las Ordenanzas d’usu del asturianu pa la sou discusión ya aprobación [textu n’asturianu occidental].

El grupu municipal d’Izquierda Xunida va defender de la mano de Plácido Rodríguez, conceyal de Cultura, unas nuevas ordenanzas que tienen como fin la regularización del usu de la llingua asturiana nel campu alministrativu del conceyu de Grau. L’oxetivu d’estas normas nun yá outru que dotar d’un espaciu llegal nel ámbitu municipal al asturianu, la modalidá llingüística con más presencia de la zona. D’esta manera, a la contra de lo que cree dalguna xente, estas ordenanzas nun obligan a naide a falar n’asturianu, sinón que dan cobertura xudicial a aquellas personas que quieran dirixise a l’Alministración local nesta llingua.

Nun se trata d’una imposición d’una llingua, sinón d’una apertura de campu d’actuación por parte de las oficinas municipales: hasta agora’l conceyu de Grau solo usaba’l castellanu por defectu nel tratu cola población, pero a partir d’agora la xente va ser llibre d’escoyer en qué llingua quier ser atendida. L’asignación de derechos a los falantes d’asturianu nun significa la perda de derechos de los castellanoparlantes, pues nun se trata de dalgo tanxible ou físico, sinón d’una cuestión de declaración de voluntades ya valores ya de respetu hacia los demás. Si bien estas ordenanzas nun son más que l’empiezu d’un procesu que va llevar tiempu (cola formación de los servicios municipales ya cola adecuación progresiva ya positiva de la llingua asturiana a los sistemas alministrativos), esta equiparación llegal del castellanu ya del asturianu marca un feichu importante na historia del conceyu moscón, pues nunca antes se diera tantu consensu social ya tanta apertura de mente respecto a un tema identariu de tantu caláu.

Estas ordenanzas proponen ente outras cousas la consideración de los derechos d’aquellas personas que s’espresen n’asturianu ya garantizan la non discriminación de naide pola llingua qu’use. Amás plantean que’l Conceyu faiga las sous publicaciones billingües ya deixan la puerta abierta pa que tolos documentos internos ou esternos de carácter alministrativu se redacten n’asturianu, en castellanu ou nos dos idiomas. De la mesma manera estas ordenanzas formulan la voluntá del Conceyu moscón de faer una promoción activa del usu de la llingua asturiana por parte de la población, tanto oral como escritu, en tolos ámbitos, ufiertando cursos formativos ya xornadas divulgativas.

Las Ordenanzas d’usu del asturianu nel territoriu de Grau fonon feichas pol Serviciu de Normalización Llingüística en conxuntu con dellos xuristas de renome del campu alministrativu a nivel autonómicu ya estatal, puliendo los defectos de las ordenanzas similares sobre’l mesmu tema d’outros conceyos ya adaptando la redacción a las esixencias que marca l’actualidá del sieglu XXI.

Tamién te podria gustar