Portada Educación Gotor sigue al frentre de la Universidá d’Uviéu

Gotor sigue al frentre de la Universidá d’Uviéu

by asturnet

Vicente Gotor Santamaría arrasó nes elecciones a Rector de la Universidá d’Uviéu, faciendo medrar la diferencia qu’algamare nes elecciones de 2008 y llegando hasta un 66.52% del votu ponderáu. Paz Andrés Sáenz, candidata de la oposición, consiguió 2.332 votos, el 33,62% del votu ponderáu. Nel ámbitu de la reivindicación llingüística, dambos candidatos firmaren col Conceyu Universitariu pol Asturianu (CUPA), el documentu Alcuerdu Programáticu pa la Política Llingüística na Universidá d’Uviéu (2012-2016), y recibieron a Xunta Moza, que-yos propunxo crear una Serviciu de Normalización Llingüística, polo que no que cinca al ámbitu de la normalización del asturianu, el consensu ye cada vegada mayor na insititución cimera de la formación n’Asturies.

Nuna nota unviada ayeri a los medios el CUPA felicitóse “pol consensu xeneráu alredor del asturianu na Universidá d’Uviéu”, reconociendo tanto a Vicente Gotor como a Paz Andrés “el so compromisu programáticu cola política llingüística”, espeyáu na firma d’un documentu del CUPA nel que se planteguen lo que la organización conidera “dalgunos puntos esenciales pendientes y un calendariu pa llevalos alantre”. Una riestra d’acciones concretes que pal CUPA “garantiza que nos próximos años sigan dándose pasos pola normalización del asturianu na Universidá asturiana”.

L’alcuerdu inclúi 5 puntos que’l CUPA considera esenciales pal futuru del asturianu na Universidá d’Uviéu: aprobar un reglamentu de rotulación pa la Universidá d’Uviéu nel que se recueya la rotulación billingüe de tolos cartelos, la llucha pol reconocimientu de les categoríes profesionales de los maestros y profesores d’asturianu, reforzar les competencies de la Comisión de Normalización Llingüística de la Universidá d’Uviéu, encargándo-y la redacción d’un Plan de Normalización Llingüística pal periodu del mandatu rectoral y, amás d’otres cuestiones, diseñar y oficializar un logotipu billingüe (asturianuy/castellán) de la Universidá d’Uviéu nel que dambos nomes apaezan siempres y ensin diferencies gráfiques ente les dos llingües.

Pela so parte, Xunta Moza, esplicó n’otra nota qu’aconceyó delles veces con dambos candidatos “a petición de les dos candidatures”. Nestos conceyos Xunta Moza esplicó “cuáles son les midíes a tomar pa consiguir que s’acabe cola discriminación histórica que vien carenciendo l’estudiantáu, el profesoráu, los trabayadores y toles persones vinculaes, d’una o otra manera, cola Universidá d’Uviéu, y que tienen como llingua d’usu cotidianu l’asturianu”.

Dende Xunta Moza animóse tanto a Gotor como a Andrés a recuperar l’espíritu en favor del idioma de la Universidá asturiana d’entesieglos, como Félix d’Aramburu o Fermín Canella, y separtase de polítiques prexuicioses y acomplexaes en contra del asturianu de los últimos tiempos, “personificaes na figura de Juan Vázquez”.

Xunta Moza propunxo “•la creación d’un serviciu de normalización llinguística que lleve alantre un plan pa la normalización del asturianu na Universidá con medíes, acciones y plazos concretos”. Tamién se quixo insistir na situación precaria del asturianu dientro de la Facultá de Filoloxía, puesto que sigue siendo “la única llingua moderna que nun cuenta con una asigantura nel primer cursu común pa toles filoloxíes, amás de la inexistencia d’un grau propiu en Llingua Asturiana”.

Otra manera, la Xunta reclamó a les dos candidatures la inclusión de la prueba d’asturianu nos exámenes d’accesu a la Universidá, porque, anque l’asturianu ye una de les asignatures optatives en Bachilleratu, ye la única que nun sirve pa xubir nota na fase voluntaria de la PAU, cuestión calificada por Xunta Moza como “chocante”. Otra de les cuestiones foi “la necesidá de crear un seriviu de traducción propiu, y non delegar na Conseyería de Cultura lo que tien que xestionar la propia universidá, como se fexo en 2009 cola firma d’un protocolu ente dambes dos instuciones pa que fuera’l Principáu quien traduciera la documentación de la Universidá”.

Resultaos completos de les elecciones

Tamién te podria gustar