Google anima a viaxar pola lliteratura dende casa nel Día del Llibru

Averase a la hestoria del llibru y la llectura, a la vida y obra d’autores reconocíos -especialmente a la de Cervantes- son dalgunes de les propuestes que fai Google pa esti xueves 23 d’abril, Día Internacional del Llibru , por que los llectores puedan festexar esta xornada dende los sos llares.

Ye una conmemoración mundial que busca fomentar la llectura y reconocer la industria editorial y los derechos d’autor y qu’anguaño tendrá de celebrase de forma distinta esfrutando de la llectura ensin salir de casa, recordó Google esti llunes, que sorrayó les numberoses colecciones lliteraries qu’alluga en Google Arts Culture, desque se creó en 2011.

Y esplica que los usuarios van poder faer un percorríu pola vida y obra del autor de Miguel de Cervantes, pola España de la so dómina y los distintos llugares que l’autor representa en Don Quixote, según conocer a los sos personaxes lliterarios, dende la so primer obra, “La Galatea” a la postrera “Los trabayos de Persiles y Sigismunda”. Y conocer en fondura la vida del autor y faer un percorríu pol Muséu de la so Casa Natal en Alcalá de Henares (Madrid) na fecha na que se conmemora’l so fallecimientu.

Pero tamién van poder averase a la hestoria de los llibros al traviés de la colección “Llibros: de rollos a pantalles”, onde los usuarios van afayar cómo los llibros pasaron de rollos manuscritos a publicaciones digitalizadas. Tamién van tener la oportunidá de conocer cuálos fueron los primeros llibros del so tipu como, por casu, el primer atles modernu o’l primer llibru de contabilidá modernu.

La esposición virtual alluga un esperimentu con Google Books al traviés del cual pueden llograse encamientos lliterarios a partir d’imaxes. Amás, ente otres opciones, la colección ufierta un espaciu destacáu que percuerre les distintes etapes de la ellaboración d’un manuscritu medieval.

Amás de percorrer virtualmente delles de les biblioteques más increíbles del mundu, ye posible afayar dende casa los llugares qu’inspiraron famoses obres de la lliteratura. Asina, al traviés de la plataforma los usuarios van poder faer un percorríu por distintos llugares qu’inspiraron a distintos autores nes sos obres más reconocíes y conocer la vida de Virginia Woolf en Londres y ver los llugares que marcaron la so obra. Los aficionaos a les hermanes Brontë van tener la opción d’afayar los paisaxes qu’inspiraron el trabayu de les trés hermanes al traviés d’un percorríu lliterariu virtual.

O, al traviés de la colección “‘10 llugares pa los amantes de Jane Austen”, esquizar los llugares qu’inspiraron obres de l’autora inglesa como “Arguyu y Prexuiciu”, “Emma” o “Mansfield Park” según los llugares de filmación de les sos adaptaciones a la televisión y cine .

Los más mozos tamién pueden celebrar el Día del Llibru al traviés de la colección “Harry Potter: Una hestoria de la maxa” y visitar virtualmente la esposición de la Biblioteca Británica sobro la obra de J.K Rowling, esquizar les ilustraciones de la colección de llibros de la saga y los primeros bocetos de los manuscritos de la mesma autora, indica Google.