El circuitu lliterariu ‘Autores nel camín’, pol que puxa la Conseyería de Cultura, Política Llingüística y Turismu, al traviés de la direición Xeneral de Política Llingüística, y que lu protagonicen escritores ganadores de los premios en llingua asturiana, llega otra vegada más a Avilés.
El Palaciu de Valdecarzana acueye’l llunes, 20 d’avientu, a les 19 hores, un actu poéticu-lliterariu del autor Gonzalo González Barreñada, cola llectura de poemes del llibru ganador del Premiu Xuan María Acebal 2019, entituláu El llar n’orde. La entrada ye llibre hasta completar l’aforu y ye obligatorio respetar les midíes de seguridá escontra’l Covid, incluyíu l’usu obligatoriu de la mázcara.
Ente les obres presentaes, el xuráu decidió da-y el premiu a esti poemariu de González Barreñada destacando “La singularidá de la voz poética que recrea con emoción el paisaxe natural y humanu n’Asturies con una llingua qu’afonda nes posibilidaes del versu llargu averándose a la prosa”.
El Principáu entamó esti proyeutu ‘Autores nel camín’ p’averar al públicu asturianu a los y les autores ganadores de los premios convocaos pola Conseyería, los más prestixosos de les lletres asturianes, y afayar asina alcuentros, recitales y talleres lliterarios.
La iniciativa ye posible gracies a la participación de los Servicios de Normalización Llingüística, y cola intención de la Direición Xeneral de Política Llingüística d’incorporar la collaboración de biblioteques y cases de cultura. Yá se fixeron alcuentros amás d’Avilés en Corvera, Candás, Langreo/Llangréu, Colunga, Grado/Grau y Lena/¿¿ena, cola participación d’autores como Xune Elipe, Rodrigo Cuevas, Francisco Álvarez, Inaciu Galán, Vero Suari, ruma Barbero, Alberto Vázquez, Sidoro Villa, Lafu y Rebeca.
Gonzalo González Barreñada (Sotrondio, 1973), llicenciáu en Xeografía Historia, ye poeta y narrador en llingua asturiana. La so obra etiquétase como “realismu máxicu”, con influyencia tamién del cuentu tradicional.
Obres
•((2015) Dos cuentos na revista Campu de los Patos númb. doble 5-6
•(2016) Biografíes. Saltadera.
•(2017) El cuadernu bermeyu na revista Campu de los Patos númb. 7
•(2018) La casa de Xuan Buelga. Saltadera.
•(2018) Hestories de Burgundu. Saltadera.
•(2019) El pesu de la lluz. Saltadera.
•(2020) El llar n’orde. Ediciones Trabe.
•(2021) La hestoria ensin contar. Ediciones Trabe.
