Genaro Alonso nun ve marxe pa rebaxar les tases universitaries

Genaro Alonso nun ve marxe pa rebaxar les tases universitaries
22 marzu 11:51 2018 Imprimir

“El ministeriu ye bien arrogante al anunciar esta midida. Él convida y nós pagamos”, reprocha’l conseyeru d’Educación, Genaro Alonso, que ficiera esti día unes declaraciones nes que nun ve marxe para una rebaxa sustancial de les tases universitaries.

El Ministeriu d’Educación ta dispuestu a amenorgar les bandes de precios a partir de les cuales les comunidaes autónomes afiten les tases de matriculación en graos y másteres universitarios. Y va facelo si’l proyectu de Presupuestos Xenerales acaba siendo aprobáu nel Congresu. Pero esa posibilidá, la de baxar los precios de les matrícules a los universitarios, va tener qu’estudiase agora en cada comunidá. Ye lo que, según manifestó ayeri’l conseyeru d’Educación, Genaro Alonso, va faer el Principáu. Anque yá avanza que, tres seis años ensin tocar les tases de primera matrícula nos graos qu’ufierta la Universidá d’Uviéu’l Principáu nun preve «demasiao marxe pa una rebaxa sustancial».

Lo que vamos faer ye estudiar esta nueva situación y ver si se pue  faer dalgún tipu de rebaxa según espunxo Genaro Alonso, na so visita les obres d’ampliación del aulariu infantil del colexu de La Corredoria, n’Uviéu. El conseyeru d’Educación nomó d’arrogante al ministru d’Educación, Cultura y Deporte, Íñigo Méndez de Vigo, que llegó a dexar abierta la puerta a la gratuidá de les matrícules, camentando que ye bien arrogante al anunciar esta midida, porque “él convida y nós pagamos”, dixo en referencia a que “quien van tener que pagar l’amenorgamientu de tases son les comunidaes autónomes”.

El ministeriu yá baxó l’añu pasáu’l preciu los másteres non habilitantes pa dexar que les sos tases igualaranse a les de los graos. Agora lo que pretende ye faer lo mesmo colos estudios de grau pa, según manifestó’l miércoles Méndez de Vigo, «dexar que sían más algamadizos». Los alumnos de la Universidá d’Uviéu demanden un amenorgamientu de les tases de primera, segunda y socesives matrícules y la equiparación a la baxa de los precios de grau y máster. Va unos meses unviaron al conseyeru d’Educación un escritu nel que-y encamentaben a aplicar una rebaxa progresiva de les tases de matriculación a partir del cursu 2018-2019.

 

  Categories: