Portada Política Gaspar Llamazares presentó la dimisión nun discursu pronunciáu en Mieres

Gaspar Llamazares presentó la dimisión nun discursu pronunciáu en Mieres

by asturnet

Gaspar Llamazares presentó estos díes la so dimisión como Coordinador d’Izquierda Xunida federal en Mieres. Asturnews reproduz un estractu del so discursu, nel que reinvindico a Asturies como “la mio tierra” amás de “cuna del Partíu Comunista d’España, de los comunistes, independientemente de quien seyan los sos dirixentes”.

Esti ye’l discursu completu:

Vengo a dar cuenta a los míos, a los más míos, de la fin d’una etapa al frente de la coordinación xeneral, pero al tiempu vengo a manifestavos el mio compromisu pa siguir participando activamente en política, pa siguir militando activamente n’IX y pa contribuyir dende l’escañu, nel Congresu de los diputaos, a poner voz a los ensin voz, a rellanzar IX, a defender el proyectu políticu de los trabayadores y de los ciudadanos d’esti país.
Fáigolo n’Asturies, en Mieres, non solo porque ye la mio tierra, sinón tamien porque representa la memoria “roja” y republicana, la identidá de la mio Izquierda Xunida. Porque esta ye la cuna del Partíu Comunista d’España, de los comunistes, independientemente de quien seyan los sos dirixentes.
Termino la mio etapa como Coordinador con una sensación agridulce: amarga pola derrota electoral y duce por tener l’arguyu y el privilexu de tener dirixíu a IX na llucha escontra la guerra d’Iraq o a la escontra del rexime d’Aznar; de tener contribuyío a facer realidá avances sociales importantes nesti país, defendendo los drechos de los trabayadores y los drechos civiles de tolos ciudadanos al marxe de la so orientación; de tener avanzao na recuperación de la nuestra memoria republicana; de tener impulsaes midíes y acciones que beneficien a la mayoría de la sociedá.
Se que les derrotes tienen responsables y reconozo la mio responsabilidá política y, por tanto, contribuire a garantizar la continuidá de lo que realmente ye importante: el proyectu políticu que representa IX. Por eso presento güei equí la mio dimisión. Asumo, por tanto, la mio responsabilidá, pero nenguna culpa. Toi convencíu de que’l nuestru retrocesu electoral debese en gran parte al bipartidismu, pero reconozo que tamien cometimos errores. Por eso, doi un pasu atrás. Decidí facelo agora, enantes de l’asamblea federal, porque nun quiero que la nuestra asamblea comience en clave de pasáu, de reproches o de confrontación. Quiero que la próxima asamblea federal entame mirando p’hacia’l futuru, abordando los problemes de los trabayadores y los ciudadanos ente la crisis y dando soluciones dende la izquierda.
IX tien que ser el partíu de la utopía. Una utopía colos pies nel suelu, con propuestes y soluciones concretes, una Izquierda Xunida que llidere’l movimientu escontra la crisis, que defenda un nuevu socialismu pal sieglu XXI, una IX más abierta y menos sectaria, más federal y menos individualista, una IX que seya capaz de facer la revolución concreta del día a día y que nun caiga nel error de practicar la revolución de chigre. La crisis financiera ye la crisis del neocapitalismu, la crisis d’un capitalismu que nun tuvo nenguna cortapisa, que relegó la economía real y que pon en peligru a una gran parte de la humanidá y el futuru del nuestru planeta. El retu nun ye, pues, refundar el capitalismu, el retu pa la izquierda ye refundar el socialismu, al tiempu que llogramos aliances pa gobernar, pa tresformar el nuestru modelu económicu. Nun queremos que s’alcuerden del socialismu namás pa socializar les perdes, queremos intervenir pa socializar tamien los beneficios, pa evitar la fame de mil millones de persones y el cambiu climáticu, pa defender l’interes xeneral y non los bolsos d’unos pocos. Pa esto necesitamos unidá pero tamien necesitamos cambios.
Necesitamos unidá con más participación, más pluralidá, y más amabilidad interna. Necesitamos cambios, necesitamos ser más imaxinativos, más heterodoxos y menos dogmáticos, más abiertos y menos sectarios; necesitamos una organización que respete la federalidá, que pueda ser la espresión política de más sectores, que pueda ser el proyectu capaz d’aglutinar a la izquierda tresformadora d’esti país.
Termino y fáigolo emplazándovos a vós, lo meyor d’IX, pa qu’encabeceis un movimientu de refundación de la izquierda y el procesu constituyente n’Izquierda Xunida. Ye necesario tender la mano a toa IX pa recomponer y rellanzar el nuesu poryectu, pa que la próxima seya una asamblea que mire al futuru, que de respuestes a los problemes de la xente; una asamblea sobre los problemes y los retos d’anguaño, una asamblea que seya parte d’una movilización social pa garantizar una salida, dende la izquierda, a la crisis. Foi un honor ser el vuestru Coordinador y sedrá un honor siguir siendo el vuestru diputáu.

Tamién te podria gustar