García Oliva algama’l Xosefa Canellada

García Oliva algama’l Xosefa Canellada
24 18:32 2015 Imprimir

Vicente García Oliva algamaba esti día’l VIII Premiu María Xosefa Canellada de lliteratura infantil y xuvenil con “Fontenebrosa III: el final”.La obra premiada ye’l final del ciclu de trés histories que García Oliva entamara en 1984 con “Fontenebrosa: El reinu de los silentes”, considerada pola crítica como la primer novela xuvenil en llingua asturiana y que foi siguida en 2011 por “Fontenebrosa II: la rebelión de los homosaurios”.

Esta ye la segunda vegada que García Oliva algama ún de los Premios Lliterarios que convoca añalmente’l Principáu tres de llograr el Premiu  Máximo Fuertes Acevedo en 2010.

El xuráu del premiu tuvo formáu polos escritores y especialistes Lourdes Álvarez García, María Teresa González, José Luis Remis y María Xosé Rodríguez; amás del alcalde de Cabranes, Gerardo Fabián, y Alonso Zamora, fíu de María Xosefa Canellada, baxo la presidencia del direutor xeneral de Planificación Llingüística y Normalización, Fernando Padilla. Y ente los ochos trabayos presentaos, el xuráu aconceyáu na  Casa la Cultura de Santoloya (Cabranes) decidió por unanimidá premiar el llibru ‘Fontenebrosa III: el final’, presentáu baxo’l nomatu de ‘Ermesinda’, xustificando la decisión pola “habilidá cola que se construye un universu míticu a partir del ritmu narrativu y la caracterización de los personaxes”.

L’autor de la obra yera García Oliva, escritor pernomáu de la primer xeneración del resurdimientu, ye académicu de númberu de l’Academia de la Llingua Asturiana y destacáu autor de lliteratura fantástica. Algamó’l Máximo Fuertes Acevedo d’ensayu en 2010 con ‘El síndrome de Sherezade’ y tien también un Premiu Timón p’autores n’asturianu y gallego-asturianu, de 2011, qu’entrega l’Asociación Cultural L’Arribada.

Esti ye’l segundu de los cinco Premios Lliterarios 2015 que se falla, depués que se diera conocer hai dellos díes el ganador del VII Premiu Alfonso Iglesias de cómic: Ruma Barbero por ‘El viaxe a la lluz’.

Loading Facebook Comments ...