García Granda ye l’unicu candidatu a rector qu’ufre n’asturianu sos propuestes

La campaña electoral al Rectoráu de la Universidá d’Uviéu entamó esti xueves 28 colos dos candidatos ufiertando los sos programes nes webs de campaña y la sorpresa de que namái unu d’ellos ufre una versión en llingua asturiana del mesmu, normalizando dafechu’l so usu nel procesu y emplegándolu con normalidá nos sos materiales de campaña.

Paecía que nun diba volver a vese esta situación, pero namái qu’un de los dos candidatos al Rectoráu qu’entamaron ayeri la so carrera electoral emplega l’asturianu cobn normalidá ufiertando’l so programa y el so material de campaña en llingua asturiana. Santiago Garcíua Granda ufre una versión en llingua asturiana del so programa, al tiempu que tamién lo da n’inglés, amosando el trillingüismu del que fai gala dende qu’entamara so mandartu rectoral dende 2016.

Amás de apostar por siguir avanzando na normalización del asturianu na institución y proponer valorar la competencia llingüística nos sos procesos, Santiago García Granda emplega l’asturianu nos sos vídeos de campaña, nos sos programes, dípticos ya información, con una páxina web trillingüe.

Ensin embargu, l’otru candidatu, Ignacio Villaverde, llega a escribir nel so programa que “el asturiano, como lengua y bien académico y cultural es parte de la Universidad asturiana, y para ello no hace falta comprometer a la Universidad ideológica o políticamente ni alterar nuestros procesos de toma de decisión y las competencias de nuestros órganos de gobierno”, nuna incomprensible crítica a los nuevos reglamentos de defensa de TFG y TFM contestaos por una minoría que nun quier permitir que se puean defender n’asturianu los Trabayos de Fin d’Estudios.

Santiago García Granda presenta so candidatura

No que cinca a los sos llogros, l’actual Rector ta poniendo enrriba la mesa que quince años dempués d’abandonalu, la Universidá d’Uviéu llogró asitiase nel top 500 de les meyores universidaes del mundu según el ránking de Shanghái, y amás hai bones perspectives para caltener esa posición. Daqué paecíu al ésitu en tresparencia, que fixo pasar a la institución de ser considerada nos rankings la más opaca a ser la segunda más tresparente d’España.

Aprovechando al máximu la tasa de reposición, Santiago García Granda punxo de manifiestu la medría de la plantiya docente, sacando a concursu 526 places en cuatro años, acabando con tolos denominaos asociaos impropios y los contratos precarizados.

N’internacionalización, el despegue del mandatu rectoral ye consideráu de tou un ésitu, por culpa de que se triplicó la captación de fondos nel programa Erasmus plus y por tantu la movilidá para nel estudiantáu. Tamién destacó na presentación del so programa les solicitúes d’ayudes d’urxente necesidá, que la so cuantía pasó de 709.000 a 900.000 euros nestos cuatro años.