García Granda cree que “la nueva prueba d’accesu ‘asela’ a la comunidá educativa”

García Granda cree que “la nueva prueba d’accesu ‘asela’ a la comunidá educativa”
29 13:26 2016 Imprimir

El rector de la Universidá d’Uviéu, Santiago García Granda, vieno acabante afirmar que l’alcuerdu pa la realización d’una nueva prueba d’accesu a la universidá pa esti cursu da “tranquilidá” a la comunidá educativa y aseguró que namá va suponer realizar “pequenos axustes”.

A entrugues de los periodistes en roblando un conveniu de collaboración cola empresa Hunosa, García Granda afirmó que l’alcuerdu anunciáu tres la xunta del ministru d’Educación, Íñigo Méndez de Vigo, col presidente de la Conferencia de Rectores CRUE, Segundu Píriz, ye “una gran noticia” paras les families y los alumnos de segundu de Bachilleratu. Estos alumnos van tener qu’esaminase de seis asignatures de segundu de Bachilleratu pa poder aportar a la universidá, coles que van poder llograr un máximu de catorce punto.

Na anterior Selectividá había dos fases, la xeneral, que yera obligatoria (podía llograse un máximu de 10 puntos) y otra específica o voluntaria pa xubir nota hasta los 14 puntos. Agora, cola prueba anunciada, tolos estudiantes van esaminase de seis asignatures troncales (troncales xenerales y troncales d’opción) del segundu cursu de Bachiller, anque solo la nota de dos de les materies (de les d’opción) va tenese en cuenta pa llegar a los 14 puntos.

Los estudiantes namái se van tener qu’esaminar de les asignatures troncales y asegurase asina la participación de les universidaes en coordinación coles comunidaes na so realización y el caltenimientu del distritu únicu, ye dicir la nota va valir pa les universidaes de toa España. “A mi paezme que fiximos un viaxe bien llargu p’acabar onde tábamos”, sorrayó García Granda, dando la bienvenida “a la nueva o vieya PAU que resuelve un montón de problemes a les universidaes”.

Recordó que la Universidá yá roblara un alcuerdu col Principáu pa encargase de probar accesu que prevía la Lomce, que yera “bien complexa”, y afirmó que la institución que dirixe ta preparada pa llevar a cabu esta prueba d’accesu como se venía faciendo hasta agora yá que namái se tienen de faer “pequenos axustes”. A lo último, pidió a los partíos políticos que se pongan d’alcuerdu, cuntando cola comunidá educativa, pa pensar en nuevos métodos pa consensuar una prueba d’accesu a la universidá nos próximos cursos.

  Categories: