García Granda celebra n’asturianu’l pase a la segunda vuelta con Muñiz en Uniovi

García Granda celebra n’asturianu’l pase a la segunda vuelta con Muñiz en Uniovi
22 abril 10:34 2016 Imprimir

Santiago García Granda ganó con 90 votos más que José Muñiz la primer vuelta de les elecciones al Rectoráu celebraes esti xueves na Universidá d’Uviéu, anque’l votu ponderáu que da mayor valir al profesoráu qu’a otros estamentos allugó a Muñiz un puntu porcentual penrriba de García Granda que siguió usando l’asturianu pa felicitar a la comunidá académica pol resultáu.

El catedráticu de Psicometría José Muñiz, col 34,004% de los votos ponderaos, y García Granda, catedráticu de Química Física, col 32,94%, van disputar la segunda vuelta electoral, que se va celebrar el xueves que vien, a la espera de la decisión de la Xunta Electoral Central. Los otros dos candidatos qu’aspiraben al rectoráu, Pedro Sánchez Llazu, de Bioquímica, y Agustín Costa, de Química, llograron el 25,3875% y el 7,7932% de los votos ponderaos, respectivamente.

La participación algamó’l 26,48%, daqué más de dos puntos percima del porcentaxe rexistráu en 2012. En númberos absolutos, José Muñiz llogró 2.017 votos; Santiago García Granda, 2.107; Pedro Sánchez Llazu, 1.844; y Agustín Mariña, 360 sufraxos.

Por sectores, la mayor participación asitiose nel colectivu de profesores doctores con vinculación permanente, con un 86,48 (1.309 votantes); siguíu pol Personal d’Alministración y Servicios (PAS), con un 80,15% (759); el restu del personal docente ya investigador rexistró un 55,84% de participación (626); y finalmente el colectivu d’estudiantes, con un 18,96% de participación (4.090 sufraxos).

El campus que más votó nes urnes foi Uviéu Centru, con un 43,21% de votantes; siguíu de Cristu B, con un 34,01%; Uviéu centro y Humanidaes, con un 33,51%; Llamaquique-El Catalanes, con 26,76%; Mieres, con un 26,47%; El Cristu A, con un 20,44%; Campus de Xixón, con un 21,41%; y Xixón- Llaboral, un 16,05%.

A la segunda vuelta tán llamaos a les urnes 24.957 electores que conformen el censu universitariu. El votu final ponderáu ta distribuyíu en porcentaxes ente los siguientes colectivos: Profesores doctores: 55%; Restu de personal docente ya investigador: 10%; Estudiantes de primer y segundu ciclos, grau, máster o doctoráu: 25%; Personal d’Alministración y Servicios: 10%.

Loading Facebook Comments ...