García Arias presenta’l DELLA nuna Universidá comprometida cola cultura de nueso

by redacción asturnews | marzo 16, 2018 10:39 am

El Rector de la Universidá d’Uviéu, D. Santiago García Granda, peslló l’actu presentación del Diccionariu Etimolóxicu de la Llingua Asturiana (DELLA) nel Paraninfu esti xueves énte un auditoriu llenu de la representación político y cultural d’Asturies qu’amosó’l papel comprometíu de la Universid  pa cola llingua y la cultura de nueso.

Esti xueves, 15 de marzu, tuvo llugar la presentación del Diccionariu Etimolóxicu de la Llingua Asturiana (DELLA) nel Paraninfu de la Universidá d’Uviéu énte un auditoriu llenu y nel qu’había una amplia representación del mundu académicu, cultural y de la política d’Asturies.  La representación institucional entamaba por Fernando Padilla Palicio (Direutor Xeneral de Planificación Llingüística y Normalización) xunto a José Luis Borge (Vicerrector d’Estensión Universitaria y Proyeición Internacional), el decanu de la Facultá de Filosofía y Lletres, José Antonio Rodríguez Gómez, y el vicedecanu d’esa mesma Facultá, Juan José García González, y dellos profesores de la institución universitaria como Antonio Fernández Insuela, Jesús Menéndez Peláez, Xulio Viejo Fernández, José Antonio Álvarez Castrillón, Alberto Fernández Costales, o Roser Calaf Masach.  José Ramón Rodríguez Direutor del RIDEA y Direutor de la Biblioteca de la Universidá d’Uviéu) o María Jesús Villaverde (Bibliotecaria del RIDEA) presenciaben tamién l’actu xunto con representantes políticos como María Concepción Paredes (Direutora del Archivu Históricu Provincial d’Asturies), los diputaos na Xunta Xeneral, Emilio León (Podemos) y Concha Masa (IX); los conceyales del Conceyu d’Uviéu, Roberto Sánchez Ramos (Conceyal de Cultura) y Fernando Villacampa (Conceyal de Deportes); representantes de partíos políticos como Fernando Prendes (PSOE) o Lluis Miguel Orviz (Podemos) y xunto a ellos, representantes sindicales del mundu de la enseñanza (FETE-UXT, CC OO enseñanza y SUATEA). D’igual mou foi bultable la presencia de compañeros y compañeres de l’Academia de la Llingua nos bancos del Paraninfu, con la presencia d’Ana Ma Cano González, Carlos Lastra López, Carmen Muñiz Cachón, Francisco Javier Fernández Conde, o Lluis Xabel Álvarez ente otros.

Presentábase’l primer volume de la obra cimera del llabor investigador del Dr. Xosé Lluís García Arias, profesor honorariu de la Universidá d’Uviéu y numberariu de l’Academia de la Llingua Asturiana de la que foi presidente nel periodu 1981- 2001. Un llabor que vieno desendolcando, a lo llargo de tola so vida académica, dedicada al estudiu de la llingua asturiana, dende la so historia interna y evolución, la toponimia asturiana hasta’l trabayu que güei s’asoleya sobre la etimoloxía del léxicu de la llingua asturiana.

L’actu cuntó coles intervenciones de D. Xosé Antón González Riaño, Presidente de l’Academia de la Llingua Asturiana; el profesor de la Universidá de Viena, D. Michael Metzeltin, qu’impartió la conferencia de presentación d’esti volume primeru; D. Xosé Lluís García Arias, autor de la obra y Profesor Honorariu de la Universidá d’Uviéu y D. Santiago García Granda, Rector de la Universidá d’Uviéu.

El Rector de la Universidá d’Uviéu, D. Santiago García Granda, abrió l’actu y darréu dio la pallabra a Xosé Antón González Riaño, que destacó la importancia cimera de la obra: «Güei ye un día mui importante pa la Filoloxía Asturiana, pa la Llingua Asturiana y p’Asturies: dos instituciones de la máxima relevancia cultural nel Principáu, la Universidá d’Uviéu y l’Academia de la Llingua Asturiana, coediten una obra esceicional, el Diccionariu Etimolóxicu de la Llingua Asturiana». Nel so falamientu hebo tamién llugar pa la reconocencia del llabor del autor: «Tres del Diccionariu Etimolóxicu de la Llingua Asturiana asítiase’l trabayu de décades del profesor García Arias. De xuru qu’ensin él la Filoloxía Asturiana sedría otra cosa. La xente diz –y nadie discute- qu’Arias ye’l pai de la Filoloxía Asturiana. La llingua asturiana, la nuesa cultura y Asturies dében-y muncho a García Arias; poro, esti ye tamién un actu de reconocimientu al so descomanáu esfuerzu, personal y científicu, por asitiar al asturianu nel llugar que-y correspuende nel mundu».

A continuación Michael Metzeltin, profesor de la Universidá de Viena, impartió la conferencia maxistral d’esti actu de presentación na que faló de la historia de la ellaboración de los diccionarios etimolóxicos dende una perspeutiva panrománica y de la importancia y l’altor filolóxicu de la obra de García Arias nel conxuntu de les investigaciones romanístiques actuales y cómo esti Diccionariu Etimolóxicu de la Llingua Asturiana ye puntu de llegada d’un llabor d’una vida y puntu de partida pa trabayos futuros qu’enanchen la investigación del asturianu y del conxuntu de les llingües romániques.

No cimero del actu tomó la pallabra l’autor del DELLA, el profesor Xosé Lluís García Arias, que’esplicó’l procesu pel que se llega a la edición d’esti diccionariu. Asina l’autor partió de los materiales asoleyaos nel Diccionario General de la Lengua Asturiana (DGLA) a los que s’amiesta información documental de les fontes medievales del dominiu ástur y d’etapes históriques posteriores –testos lliterarios escoyíos de los sieglos XVII a entamos del XX– pa facer darréu l’estudiu etimolóxicu d’esti corpus, mirando «onde se fai un bon esfuerzu por asitiar el nuesu léxicu averándolu a les llingües de la nuesa vera xeográfica y cultural». García Arias acabó les sos pallabres col agradecimientu y reconocencia fonda a toles persones ya instituciones que collaboraron y fixeron posible que’l Diccionariu Etimolóxicu de la Llingua Asturiana pudiere asoleyase.

El Rector de la Universidá d’Uviéu, D. Santiago García Granda, peslló l’actu coles sos pallabres d’agradecimientu al trabayu científicu del profesor García Arias, del altor de la so obra güei asoleyada y del papel de la Universidá d’Uviéu como Universidá d’Asturies y comprometida cola llingua y la cultura de nueso.

Source URL: http://asturnews.com/garcia-arias-presental-della-nuna-universida-comprometida-cola-cultura-de-nueso/