García Arias fala de la toponimia medieval del conceyu de Llangréu

A les 20:00 hores d’esti xueves 20 de payares, el Centru de Referencia de la Cultura y la Llingua Asturiana va acoyer la charra “El Conceyu Llangréu na toponimia medieval” de Xose Lluis García Arias. Esti actu enmárcase dientro de la programación de les xornaes culturales De castilletes y Carbón qu’organiza’l Conceyu de Llangréu en collaboración cola Fundación Nuberu y que vien desenvolviéndose tolos xueves d’esti mes pa rematar con un conciertu del grupu Nuberu’l próximu 4 d’avientu, día de Santa Bárbola.

Xosé Lluis García Arias ñació en Teberga y ye Caderaglu de Dialectoloxía na Universidá d’Uviéu y Doctor en Filoloxía Románica, foi profesor nes universidaes d’Uviéu, Valladolid y Lleón. Cofundador y primer presidente de Conceyu Bable, García Arias foi presidente de l’Academia de la Llingua Asturiana dende la so fundación nel añu 1981 hasta l’añu 2001. García Arias ye tamién un investigador incansable y especialista en toponimia de fama mundial, ente los sos trabayos rescamplen: Llingua y sociedá asturiana; Pueblos asturianos, el porqué de sus nombres; Contribución a la gramática histórica de la lengua asturiana y a la caracterización etimológica de su léxico; Propuestes etimolóxiques; Diccionariu Xeneral de la Llingua Asturiana y Gramática histórica de la lengua asturiana.