Sociedá Galicia traza un plan pa ‘convencer’ a los habitantes del occidente asturianu de que falen gallegu by asturnet 22 de payares, 2004 written by asturnet 22 de payares, 2004 25 Reforzar la idega ente la población del occidente asturianu de que la so fala ye gallegu, “coles sos peculiaridaes dialectales, pero gallegu”. Esti ye ún de los oxetivos del plan xeneral de normalización llingüística col que’l Gobiernu gallegu quier afitar la primacía de la llingua de Galicia na franxa Navia-Eo, un documentu nel que l’Academia de la Llingua Asturiana ve un grave intentu de “galleguización” y énte’l que reclama l’acción del Principáu. El propósitu de l’Academia dexólu claru esti mediudía la presidenta d’esa entidá, Ana Cano: “Nun dexalos pasar nin un milímetru del Eo pacá”, n’alusión a les pretensiones de les autoridaes de Galicia. Y esa defensa de l’asturianidá del occidente’l Principáu, que Cano tildó de “incuestionable”, pasa, a los güeyos de l’Academia, por que’l Gobiernu asturianu salga de “la inhibición y la dexadez” na que ta instaláu y mueva ficha énte los sos colegues de la comunidá vecina. El problema, entiende la presidenta de l’Academia de la Llingua, ye que “mientres los gallegos tienen una política llingüística sumamente eficaz, equí nun tenemos política llingüística nenguna”, aseguró. Daqué especialmente grave, sostién Cano, nun momentu nel que “nos últimos venti años, l’espansionismu gallegu vien acosando a Asturies y a la so llingua”. Nesta llinia d’argumentación, y tamién p’alertar del nomamientu, hai un mes, d’un miembru de la Real Academia da Lingua Galega col envís espresu de potenciar el gallegu na franxa Eo-Navia, l’Academia asturiana unvió sendes cartes al presidente d’esi organismu y al titular de Gobiernu’l Principáu, Vicente Álvarez Areces, pero dambes misives permanecen a día de güei ensin rempuesta. El Parlamentu gallegu aprobó por unanimidá el 22 de setiembre pasáu el denomináu ‘Plan xeral de normalización da lingua galega’, el primer documentu normalizador con que se dota Galicia depués de más de 20 años. Ente les midíes que propón el testu, qu’a xuiciu d’Ana Cano “coméntase solu”, figuren la retulación de comercios del Navia-Eo en gallegu, “faciendo visible que tán nun territoriu de llingua y cultura gallega”, la enseñanza de y en gallegu en tolos centros públicos de la comarca, la “perfecta” sintonización” de la televisión pública gallega nel occidente asturianu y el puxu del idioma gallegu nel usu familiar. Nel segundu Estudiu Sociollingüísticu ellaboráu pol caderalgu Francisco Llera Ramo, dos de cada tres habitantes de la franxa ente los ríos Navia y Eo perciben lo que falen como un amiestu de gallegu y asturianu, un 16 por cientu considérenlo una variante del asturianu y sólo un 8 por cientu perciben les sos propies pallabres como una variante’l gallegu. Un 74 por cientu de la población declárase “asturiana hasta la médula”, y un 15 por cientu defínese como “asturianu, pero tamíén gallegu”. 0 FacebookTwitterPinterestEmail Anterior Ciudaes del arcu atlánticu européu aconceyarán en Xixón pa discutir sobro identidá cultural siguiente Los estudiantes d’Uviéu tendrán accesu llibre a biblioteques y aules d’informática d’otres universidaes Tamién te podria gustar Iniciativa pol Asturianu y Barbón desixen a Adif... Iniciativa reclama un mandatu marcu na RTPA Payares acueye les XLI Xornaes Internacionales d’Estudiu de... L’Atles llingüísticu del Navia-Eo ponse n’accesu llibre Aína entama’l cursu políticu con un actu n’Uviéu La Delegación asturiana en Lorient protagoniza la xornada... La UABRA aporta a la segunda selmana d’actividaes 4200 firmes sofiten la música n’asturianu en XIxón Blanca Fernández foi la pregonera de la XXVII... L’ALLA abre’l plazu pa los cursos de la...