Gabino de Lorenzo pide’l votu “a tolos asturianistes pa defender la nuestra forma de falar, la nuestra cultura”

03 marzu 11:43 2008 Imprimir

Según informaron dende fontes cercanes al Partíu Popular, el cabeza de llista d’esta formación al Congresu por Asturies, Gabino de Lorenzo, pidió ayeri domingu, en Cangues d’Onís, el votu de los asturianistes, y ente éstos tamién de los que, según dixo, “seyan d’izquierdes”, nun actu celebráu nel cine Colón, nel que solicitó l’apoyu electoral dirixéndose a los asturianistes “Votái por Gabino, que cree no mesmo que vosotros”.

Amás, De Lorenzo, cargó contra los socialistes, a los que reprochó que critiquen l’usu qu’él fai de la llingua asturiana. “Falo asturianu porque me da pola gana y los socialistes echen fumu cada vez que digo una palabra n’asturianu”, manifestó.

Otra de les cuestines llamatives nel discursu d’esti domingu foi la utilización del términu “país”, que De Lorenzo utilizó pa refirise a Asturies. Recordando que, una vez qu’ocupe’l so escañu nel Congresu de los Diputaos, y en referencia a Asturies, “esti país va ser defendíu, la nuestra forma de falar, la nuestra cultura”. El mitín del candidatu del PP finó coles actuaciones del gaiteru Vicente Prado, “El Pravianu” y el monologuista José Manuel, “El Maestru”. Una presencia d’artistes que ye habitual nos sos dicursos d’estos díes, cuntando cola presencia, esti vienres, del actor Arturo Fernández, en Xixón.

  Categories:
Loading Facebook Comments ...