Foster, Moneo y Sanaa opten a reformar el Belles Artes de Bilbao

by redacción asturnews | abril 22, 2019 11:12 am

Relevantes nomes de l’arquitectura como los Premios Pritzker Norman Foster y Rafael Moneo y reconocíos estudios internacionales d’arquitectura como’l xaponés Sanaa van competir por ganar el concursu pa reformar el Muséu de Belles Artes de Bilbao.

El xuráu encargáu d’escoyer a los estudios d’arquitectura que van optar a llevar a cabu dicha ampliación aconceyó esti mes so la presidencia del director del mesmu y de la centenaria pinacoteca, Miguel Zugaza, y escoyó a los seis estudios finalistes d’ente los 57 aspirantes presentaos.

Unu de los estudios escoyíos foi l’estudiu del reconocíu arquiteutu británicu y Premio Príncipe d’Asturies de les Artes en 2009, Norman Foster, quien proyectara y executara el Metro de Bilbao na década de los 90 del pasáu sieglu. Tamién escoyó al estudiu del internacionalmente galardonáu arquiteutu navarru Rafael Moneo, Premo Pritzker (equivalente al Nobel d’Arquitectura) en 1996, quien, al igual que Foster, cuenta con obra na zona de rexeneración urbana Abandoibarra, en Bilbao, onde llevantó la Biblioteca de la Universidá de Deusto.i

Moneo presentase en solitariu al concursu, al igual que l’estudiu del arquiteutu madrilanu Nieto Sobejano, premiáu cola medaya Alvar Aalto, concedida pol Muséu dedicáu al famosu diseñador finlandés, y autor, ente otros proyectos, del Palaciu de Congresos de Zaragoza y el Centru de Creación Contemporanea d’Andalucía. Ente los estudios internacionales escoyíos figura’l Bjarke Ingels Group, más conocíu poles sos sigles BIG, fundáu en 2005 y empobináu pol arquiteutu danés Bjarke Ingels. Sos son los proyectos acabaos del Pabellón de Dinamarca na Expo 2010 de Xangai (China), la torre Beach and Howe de Vancouver (Canadá) y en construcción del Nuevu Muséu Tamayo, de Ciudá de México, la Biblioteca Nacional de Astana (Cazayistán) y la Kaufhauskanal, Hamburgo (Alemaña).

L’estudiu ganador va llevase un premiu de 30.000 euros, ente que los otros 5 finalistes van recibir una contraprestación económica de 20.000 euros cada unu pola so participación. La redacción final del proyectu va tar dotada con unos honorarios de 1.577.000 euros. Según el calendariu que remana’l Muséu, prevese que les obres de reforma y ampliación empiecen ente marzu y abril de 2021, que tengan xuna duración envalorada de 18 meses y que tean concluyíes y puedan inaugurase ente setiembre y ochobre de 2022. El proyectu d’ampliación cunta con un presupuestu total de 18 millones d’euros.

Source URL: http://asturnews.com/foster-moneo-y-sanaa-opten-a-reformar-el-belles-artes-de-bilbao/