Foru diz asumir “la responsabilidá de caltener pa futures xeneraciones les llingües d’Asturies”

La Comisión de Cultura de Foru Asturies sumóse al traviés d’una nota a la Selmana de les Lletres y “como homenaxe a tolos escritores que supieron tresmitinos el so amor pola llingua asturiana, y con él los valores d’una sociedá qu’aspira a construyir el so progresu y la so modernidá ensin romper cola nuesa íntima tradición”. Pa Foru l’asturianu “ye un legáu hestóricu que nos otorgó un llugar propiu dientro de la realidá común y colectiva que ye España”. La formación presidida por Francisco Álvarez-Cascos diz asumir “la responsabilidá de la que, como asturianos, somos depositarios: caltener pa futures xeneraciones les llingües d’Asturies, llingües tamién d’España y, por ello, parte irrenunciable del nuesu patrimoniu común”.

El cabezaleru d’esta Comisión de Cultura, l’ex conseyeru Marcos Vallaure esplicó que “Lloñe de ser una llingua en conflictu col idioma común español, l’asturianu foi y ye en tolos nuesos escritores un elementu integrador, un llugar d’alcuentru de los asturianos colos elementos que configuren la cultura material ya inmaterial d’Asturies: los nomes de los sos llugares, la música, les costumes de les sos xentes, la lliteratura”.

Pa Vallaure “el meyor legáu recibíu d’Antón de Marrieguera, de Xosefa Xovellanos, de Caveda y Nava, del Padre Galo o de quien recibe’l nuesu merecíu homenaxe, Nené Losada, foi precisamente’l d’amosanos la llingua asturiana como un espaciu de llibertá y tolerancia (nunca un motivu d’enfrentamientu), pero tamién el de contribuyir, dende la so llibertá de creación artística, al so usu cultu, reclamando col testimoniu de la so obra’l prestixu social y la dignidá d’una llingua que nellos ye tamién idioma d’espresión culta y non solo llingua de comunicación doméstica”.