“Fortunata y Benito” llevantó de nuevu’l telón del Teatru Palacio Valdés

“Fortunata y Benito” llevantó de nuevu’l telón del Teatru Palacio Valdés
03 marzu 09:54 2021 Imprimir

Tornó’l teatru al centenariu Palaciu Valdés tres les últimes restricciones, con aforu amenorgáu pero cola mesma brillantez de siempres y la obra “Fortunata y Benito”. Les entraes, con precios d’ente 10 y 22 euros en función de la zona del teatru nun fueron problema pa enllenar l’aforu.

Una Fortunata de güei atópase con Benito Pérez Galdós nel metro, y el consideráu más grande novelista español del sieglu XIX y empiezos del XX va emponer al traviés del so universu lliterariu y hestóricu en “Fortunata y Benitu”, l’homenaxe que la compañía La Nueva y Laila Ripoll prepararon pal centenariu de la so muerte, en 2020. Una función fora d’abonu en escenAvilés, que llevantó’l telón del Teatru otra vuelta esti martes 2 de marzu, a les 19.15 hores.

“Partiendo de ‘La novela na tranvía’, llegamos a la nuesa Fortunata, pero non ensin antes añedir un chorreón d’Episodios Nacionales’, daqué de ‘Tristana’, xuna plizca de les Memories d’un esmemoriáu’, unes gotes de ‘Misericordia’, un arume de ‘La desheredada’ y una arrogante cantidá de música y baille”, esplica Ripoll.

Una actuación coral, colos mozos y brillosos intérpretes de la compañía: Eva Caballero como Fortunata, y Juan Carlos Pertusa como Benitu, y al pie de ellos, Zhilah Azadeh (Nadia), Cristina Bertol (Jacinta), Yolanda Fernández (Mauricia), Julio Montañana Hidalgo (Maxi) y Jorge Yumar (Juan).

Nuna propuesta na que la música, compuesta por Alberto Granaos, xuega un papel esencial, trazando una intersección ente les melodíes del sieglu XIX y los xéneros musicales más actuales, y tamién el baille, les coreografíes d’Andoni Larrabeiti.

La Nueva (enantes La Nueva Compañía) ye un proyectu de la Fundación Teatru Nuevu qu’axunta a profesionales de les artes escéniques cola comunidá educativa. Nació en 2012 como respuesta a la crisis d’empléu xuvenil que travesaba España y tamién como un sofitu al sector educativu énte l’amenorgamientu nes aules de les hores lectives d’enseñances artístiques y humanidaes.

  Categories: