#FormientuEnCasaFest remata la so programación con 14 díes más

El festival online #FormientuEnCasaFest remata la so programación con 14 díes más d’actividaes na so cuarta fola, que suma asina 2 meses y más de 60 actos culturales col asturianu como llingua vehicular, sumando cerca de 80.000 espectadores.

La plataforma lliteraria Formientu.com vuelve ampliar el so festival cultural fechu dende casa entamáu coincidiendo col aisllamientu de la población pola mor del andanciu de coronavirus. El festival online, unu de los más estensos de los celebraos en toa Europa, suma más de 80.000 espectadores nos dos meses d’actividá y más de 60 actividaes programaes ente conciertos, recitales, charres, alcuentros y talleres col asturianu como llingua vehicular y la cultura asturiana como protagonista.

Rematada esti domingu 3 la tercer fola del festival, el llunes 4 de mayu, arrancó la cuarta fola con un recital lliterariu de la escritora María Esther García López. El martes 5 Daniel Lobete asbrió’l festival a la participación cántabra cola charra: El cántabru: situación y perspectives del asturllionés en Cantabria, tres el pasu de dos llioneses pel festival n’anteriores foles, y de Tiégui Alves, mirandés, que vendrá’l sábadu 9 pa falar de la situación del idioma na comarca portuguesa onde se fala asturllionés.

Esti miércoles 6 Xosé Fdez. Estrada, directivu del equipu de fútbol de Ciares (Xixón) ufre la charra “La mayoría del fútbol”. El xueves 7, l’hestoriador y responsable del SNL de Corvera, Rafa R. Valdés va falar de los proyectos lliterarios que desarrolla na so oficina de normalización. El vienres 8, Día de les Lletres Asturianes (en circunstancies normales), y a les 17 hores, pa evitar coincidir colos actos virtuales reivindicativos qu’entamen delles entidaes, va celebrase una presentación del curtiumetraxe L’últimu aliendu, per parte d’Humber, del grupu Misiva, que participa nel mesmu.

El domingu 10 el doctor ya investigador del Equipu d’Otín, Xurde Menéndez Caravia, va falar de la divulgación ciéntifica n’asturianu: claves pal futuru. Del llunes 11 al miércoles 13 habrá espaciu pa la música y la tradición dende distintes perspectives: Andrea Joglar, el llunes; Xosé Ambás y Ramsés Ilesies, el martes; y Diego Castañón, cola charra: El rap n’Asturies, el miércoles.

El xueves 14, el cineasta Pablo A. Quiroga va dar una charra-taller sobre’l guión nel curtiumetraxe asturianu. El vienres, sedrá’l turnu del músicu y artesanu Illán Escalada, que va falar del futuru de la música asturiana. El sábadu 16, la mocísima poeta Alma Hidalgo va dar un recital.

Y el domingu 17, pa poner el ramu a más de 60 díes del #FormientuEnCasaFest, los sos responsables, Diego Solís & Inaciu Galán, van tener un diálogu pa facer balance del mesmu y abrir interrogantes y facer propuestes de futuru no que cinca a la industria cultural asturiana.

Toles charres van poder vese a les 7 la tarde na páxina de Formientu en Facebook. L’enllaz nel que van poder vese les actividaes ye’l siguiente: https://www.facebook.com/formientu/

Programación CUARTA FOLA
#FormientuEnCasaFest
(Toles actividaes son a les 19 hores na páxina de Facebook de Formientu, sacantes el vienres 8)

Llunes 4
– María Esther García López > Recital lliterariu.

Martes 5
– Daniel Lobete > Charra: El cántabru: situación y perspectives del asturllionés en Cantabria.

Miércoles 6
– Xosé Fdez. Estrada > Charra: La mayoría del fútbol.

Xueves 7
– Rafa R. Valdés > Charra: Corvera lliteraria.

Vienres 8
(17:00 hores) – Humber (Misiva) > Presentación: L’últimu aliendu.

Sábadu 9
– Tiégui Alves > Charra: L’asturllionés en Portugal, la mio esperiencia col mirandés.

Domingu 10
– Xurde Menéndez Caravia > Charra: Divulgación ciéntifica n’asturianu: claves pal futuru.

Llunes 11
– Andrea Joglar > Conciertín-alcuentru cola artista.

Martes 12
– Xosé Ambás y Ramsés Ilesies

Miércoles 13
– DIego Castañón > Charra: El rap n’Asturies.

Xueves 14
– Pablo A. Quiroga > Charra-taller: El guión nel curtiumetraxe asturianu.

Vienres 15
– Illán Escalada > Charra: El futuru de la música asturiana.

Sábadu 16
– Alma Hidalgo > Recital poéticu.

Domingu 17
– Diego Solís & Inaciu Galán > Balance del #FormientuEnCasaFest. La cultura asturiana nel andanciu, ¿y agora, qué?