Fina Frank Gilroy, escritor y premiu Pulitzer

Fina Frank Gilroy, escritor y premiu Pulitzer
15 setiembre 11:32 2015 Imprimir

Frank D. Gilroy, que morrió’l pasáu sábadu en Nueva York a los 89 años, aprendió’l so oficiu na televisión americana de los primeros cincuenta, escribiendo pieces dramátiques pa programes güei llexendarios como Playhouse 90, Studio One o Dick Powell.

En 1962 ganó’l Obie, el premiu teatral de Broadway, con Who’ll Save the Plowboy, una obra inspirada na so esperiencia mientres la Segunda Guerra Mundial, y consiguió el so primer ésitu televisivu un añu dempués al crear al detective Amos Burke, qu’interpretaría Gene Barry n’El axente Burke (Burke’s Law, 1963).

En 1964 trunfaba en Broadway con The subject was roses, qu’estrenen Irene Dailey, Jack Albertson y Martin Sheen, a les ordes de Ulu Grosbard. Una hestoria senciella y bien contada, en redol a un mozu soldáu que vuelve a casa y asisti impotente al enfrentamientu ente los sos padres. La función valió-y el Pulitzer, tres premios Tony (Meyor obra, meyor actor – Jack Albertson – y meyor director), y el galardón de los críticos neoyorquinos, que lu compararon con maestros como Eugene O’Neill o Arthur Miller.

  Categories:
Loading Facebook Comments ...