Portada Conceyos Entama’l Festival de Música Antigua de Xixón 2019

Entama’l Festival de Música Antigua de Xixón 2019

by asturnet

Xixón Música Antigua ye un proyectu entamao y coordinao dende la Fundación Municipal de Cultura, Educación y Universidá Popular que s’estructura, fundamentalmente, en redol a una programación de conciertos na que se trata de representar la variedá de llinguaxes y enclinos coesistentes nel ámbitu de la música antigua.

Na programación de conciertos anguaño va cuntase con música coral, ensembles instrumentales y programes multidisciplinares nos que s’incorporen elementos coreográficos, teatrales y lliterarios. Igualmente va haber una nueva edición de VIII Concursu Internacional de Música Antigua. Esti certame ta diseñáu pa dar a conocer el trabayu d’incipientes formaciones de música antigua. La semifinal y la final, eventos públicos, van formar parte de los conciertos del festival. Cuenta con dos premios, unu otorgáu por un xuráu especializáu y otru especial del públicu.

Parte importante del festival son los cursos y talleres. La ufierta didáctica inclúi un bloque principal dirixíu a estudiantes de música y músicos aficionaos que deseyen empecipiase nos repertorios históricos al traviés de la conocencia básica de los preseos antiguos y de los rudimentos de les dances antigües. Tamién va haber formación específica en práctiques y repertorios, casu de la música coral inglesa o la misa asturiana de gaita, según una orixinal “arrascamientu session” concebida como una suerte de jam session de música antigua.

Va cuntar asina mesmu con “Antiqvo rural”, programa concebíu pa potenciar la retroalimentación ente l’ámbitu rural y l’urbanu, utilizando como vehículu les parroquies rurales del conceyu de Xixón (anguaño na parroquia de L’Abadía Cenero) y la música antigua.

Finalmente completase la programación con “Conferencies y alcuentros”, colos alcuentros didácticos pa colectivos con capacidaes diverses, presentaciones de llibros y conferencies. Y nun podemos escaecenos de nuesu “Peque Festival 4.0. Colonia Antiqva”, esperiencia lúdicu-pedagóxica empobinada a públicu infantil pa neños y neñes dende los 6 años hasta 12.

Tamién te podria gustar