Festeyos de Xixón negocia un conciertu de U2 pal añu que vien

17 agostu 23:40 2005 Imprimir

L’Ayuntamientu de Xixón entamó va unos díes negociaciones colos productores de les xires europees de U2 pa consiguir que la banda irlandesa toque nel Molinón l’añu que vien. Les feches que se remanen pal posible conciertu de los irlandeses asítiénlu na primavera de 2006.

Acabante’l so pasu arrollador pela península ibérica la banda de Bono podía volver a Asturies si prosperen les negociaciones ente’l departementu de Festeyos del Teatru Xovellanos y los representantes de U2. Va unos díes el conceyal de la estaya, Iván Álvarez Raja viaxó hasta Donostia pa aconceyar con un de los responsables de produción de les xires internacionales de la banda y ver les posibilidaes de que l’añu que vien tean tocando en Xixón. Hasta agora desconócense los términos concretos de la negociación que podía allargase inda nos prósimos meses enantes de llegar a un alcuerdu.

Esta nun ye la primer ocasión na que l’Ayuntamientu playu tenta traer a los irlandeses. Hasta agora les dificultaes de la producción técnica de los conciertos d’U2 nel formatu que s’ufiertaben impidieron que Xixón pudiere acoyer una de les sos actuaciones. Si les negociaciones actuales lleguen a bon puertu, l’Estadiu del Molinón diba afayar el posible conciertu de los irlandeses.

  Categories:
Loading Facebook Comments ...