Festexos d’Uviéu va financiar 10 fiestes populares más que l’añu pasáu

La conceyalía de Festexos, dirixida por Roberto Sánchez Ramos, va dar ayudes a una decena de fiestes populares más de les que financiaron l’añu pasáu. La comisión de Subvenciones aprobó esta selmana por unanimidá una partida de 136.000 euros pa collaborar na organización de celebraciones en distintos barrios y pueblos del conceyu.

Esta cuantía xorrez en 20.000 euros al respective de los fondos destinaos en 2015 a esti fin y va dexar por tantu collaborar con más colectivos vecinales y ciudadanos na organización de fiestes populares. No que va d’añu la conceyalía de Festexos otorgó ayudes pa la celebración de 51 fiestes en barrios y pueblos. Les estimaciones de los técnicos calculen qu’esa cifra va amontar hasta la redolada de les 60 celebraciones cuando acabe l’añu.

Roberto Sánchez Ramos señaló coles mesmes la so intención de que’l presupuestu pa esti tipu d’ayudes xorreza na midida de lo posible nel añu 2017 y estimó a tolos grupos políticos el so votu favorable “pa sofitar l’actividá festiva promovida dende’l movimientu asociativu”.