Festexos d’Uviéu afai’l programa de ‘Folclore na cai’

Festexos d’Uviéu afai’l programa de ‘Folclore na cai’
02 abril 13:56 2020 Imprimir

La conceyalía de Festexos del Conceyu d’Uviéu afai’l programa de ‘Folclore na cai’ con actuaciones de los grupos y bandes dende los sos llares, a partir d’esti sábadu.

“Folclore en casa va estrenase el próximu sábadu, 4 d’abril, a les 11.30 hores, nel Facebook de Conceyu d’Uviéu, coles actuaciones de les bandes que participen nesti ciclu”. La conceyala de Festexos, Cuadonga Díaz, estima “el trabayu que tán faciendo toles formaciones pa ‘llevar’ la so música y los sos bailles a les nueses cases. Dende’l Conceyu d’Uviéu sigue apostándose pol nuesu folclore y pola música que tantu nos puede ayudar nestos momentos”.

“Folclore na cai” va ser agora “Folclore en casa”. Uviéu va siguir esfrutando del folclore que cada fin de selmana enllenaba les cais del cascu antiguu. L’actual situación de confinamientu derivada d’esta pandemia motivó a la conceyalía de Festexos, dirixida pola conceyala Cuadonga Díaz, a afaer el programa d’actuaciones de “Folclore na cai” “‘llevándolo’ a les nueses cases y calteniendo los oxetivos colos que nació fai yá trelce años: dar visibilidá y espaciu a tolos grupos y bandes de gaites del conceyu, sirvir d’elementu dinamizador y enriar la nuesa cultura tradicional al traviés de la música. Agora va siguir faciendo gracies a la collaboración y el gran esfuerzu que llevaron a cabo todo los participantes”, sorrayó la responsable municipal de Festexos.

Mientres les fines de selmana que dure l’estáu d’alarma, “les siete bandes y los diez grupos participantes van ufiertar actuaciones de ‘Folclore en casa’ dende les sos cases que van poder siguise al traviés de les redes sociales del Conceyu d’Uviéu y la canal oficial de Youtube”. El ciclu estrenará’l próximu sábadu, 4 d’abril, a les 11.30 hores, nel Facebook de Conceyu d’Uviéu, coles actuaciones de toles bandes que participen nesti programa y darréu podrá visualizase nel restu de redes sociales municipales.

Díaz estima “el trabayu que tán faciendo toles formaciones p’averar la so música y los sos bailles al nuesu salón. Dende’l Conceyu d’Uviéu siguimos apostando pol nuesu folclore y pola música que tantu nos puede ayudar nestos momentos”, sorraya la edil, ensin escaecer un mensaxe que yá ye hastag: “EnOviedoNosQuedamosEnCasa” y el deséu de que bien llueu nos veamos nes cais”.

  Categories: