Portada Política Fernando Lastra afita la postura del PSOE pa col asturianu: “Nun reconocemos la cooficialidá”

Fernando Lastra afita la postura del PSOE pa col asturianu: “Nun reconocemos la cooficialidá”

by asturnet

Fernando Lastra, voceru del grupu parllamentariu socialista na Xunta Xeneral d’Asturies respondió ayeri pela tarde nun vidiochat del diariu El Comercio a les entrugues plantegaes polos llectores alredor d’estremaos temes de la vida política asturiana. Delles xiraron alredor de la postura del PSOE sobre l’asturianu.

Nesta entrevista Lastra comentó “nun compartir la visión de que la FSA tea acabando col asturianu” . Pal políticu socialista “les visiones del PSOE en rellación a la llingua asturiana son conocíes. Somos claros y directos, ensin trampa nin cartón”.

Lastra recuerda “facemos una defensa de la llingua asturiana nos términos recoyíos nel artículu 4 del Estatutu y defendemos la llingua asturiana d’alcuerdu a esi marcu llegal, defendemos la llingua asturiana como un valor cultural innegable, pero nun reconocemos la cooficialidá en sintonía, creo, cola mayoría de la población asturiana”. Unes polítiques coles que Lastra camienta “cuntamos con un sofitu políticu importante”.

En cuantes al refugu de la FSA a la financiación del estáu pa les comunidaes con llingua propia, Lasta opina que “nun hai nenguna financiación, en nenguna comunidá autónoma se tuvo en cuenta’l costu d’afalar l’usu d’una llingua propia”.

Pal voceru socialista dignidá y cooficialidá “nun son términos homexéneos”, a lo qu’añadió “l’asturianu pue tener un tratamientu dignu ensin tener que definir la cooficialidá”. Ente la entruga pola oficialidá d’un militante del PSOE Lastra recordó “a los votantes y non votantes del PSOE” que’l so partíu “nunca nun foi partidariu de la cooficialidá pero sí d’un tratamientu dignu del asturianu”.

Lastra espera, sicasí, “meyorar la dignidá del tratamientu del asturianu” pero afita “la cooficialidá ye una cosa diferente”.

Consulta la entrevista completa a Fernando Lastra

Tamién te podria gustar