Fernando Alfaro aporta al Xovellanos

by redacción asturnews | enero 11, 2022 12:32 pm

Fernando Alfaro lleva yá enforma tiempu, desque empezara a finales de los ochenta con Surfin’ Bichos, dempués con Chucho y tamién sol so propiu nome, alimentando l’imaxinariu colectivu ibéricu con cantares estremos, como dosis nada calculaes d’emoción, escitación, aselu o nube, qu’aporten esti día al Xovellanos.

Dende hai tamién enforma tiempu, vien funcionando como una célula autónoma incontrolable nestos conciertos en solitariu, guitarra acústica al costazu y –en palabres del propiu Alfaro– “tocando los mios hits bastardos de siempre, dark folk, blues raru, pop hortera y punk rock n’acústicu primitivu.”

Esti martes 11 de xineru de 2022 esti elementu incontrolable aterriza en Xixón, nel Teatru Xovellanos dientro del programa Encaxa2, nesti formatu “solu show” acústicu. Ye’l momentu de ver en primer persona la cadarma de toos aquellos cantares, tal que fueron concebíes y compuestes, el primer planu de la voz y la guitarra rasposas o acariciantes, en primer llínea de fueu.

Teatru Xovellanos.
11 de xineru de 2022 a les 20 hores.

Source URL: http://asturnews.com/fernando-alfaro-aporta-al-xovellanos/