Portada Música Felpeyu toca esti vienres nel Nuevu Teatru La Felguera

Felpeyu toca esti vienres nel Nuevu Teatru La Felguera

by asturnet

El grupu Felpeyu visita Llangréu esta fin de selmana pa poner conciertu güei vienres a les 20:30 hores nel Nuevu Teatru La Felguera. Felpeyu ye un grupu de referencia de la música asturiana, fundáu en 1991 vien desarrollando la so carrera musical con munches actuaciones d’exitu per España, Europa y Australia.

El so primer trabayu discográficu fue’l discu homónimu Felpeyu, editáu en 1994 por FonoAstur. Yá d’aquella teníen publicao la maqueta Fuxide oricios (1993) y contribuyío al recopilatoriu V Festival de Música Folk Galega (Edicións Discográficas Galegas, 1993). En 1997 apaez el so segundu discu, Tierra (FonoAstur). En 2000 publiquen Live Overseas (Urchin Records), discu en directu grabáu n’Ourense pa una xra perAustralia, y en 2002 el so últimu trabayu hasta la fecha, Yá!, publicáu esta vez pola compañía creada pol grupu, Tierra Discos.

Felpeyu trabaya col fondu musical tradicional asturianu creando un discursu musical personal, potente y actual, basáu na reellaboración de cantares populares y pieces instrumentales recuperaes de fontes etnográfiques o compuestes polos sos miembros. El resultáu ye un repertorio sólidu ampliamente aceptáu por crítica y públicu, defendíu n’intensos conciertos en directu por tola xeografía asturiana y española y en países como Canadá, Líbano, Francia, Australia, Italia, Suecia, Dinamarca… Felpeyu revitaliza sones populares al traviés de les sos interpretaciones mediante l’usu d’arreglos de cuerda contundentes que respalden lletres les más de les veces creaes pol propio grupu, atopando asina un términu mediu ente creatividá y tradición, y siempre col envís d’esfrutar faciendo bona música sobre l’escenariu.

Tamién te podria gustar