Faru celebra les I Xornaes Divulgatives de l’Alfarería

Faru celebra les I Xornaes Divulgatives de l’Alfarería
21 13:57 2019 Imprimir

El conceyal de Cultura, Jose Luis Costielles, presentó esta selmana les I Xornaes Divulgatives de l’Alfarería de Faru que se van desenvolver los díes 21 y 22 de payares nel Cibercentru de La Lila y el día 23 nel centru social de la localidá.

Una cita que tien como oxetivu visibilizar esta industria milenario que tenemos a escasos minutos de la cai Uría d’Uviéu, indicó’l conceyal, “a la que vamos  siguir sofitando dende’l Conceyu d’Uviéu”. Asina, el conceyal de Cultura comprometióse a caltener, “ya intentar ameyorar no que se pueda” la “mesma subvención que l’Asociación d’Amigos de l’Alfarería de Faru recibió nos últimos años”.

José Manuel Vega “Selito” y Eva Sánchez, presidente y secretaria respectivamente d’esta entidá, sorrayaron la importancia d’esta industria que los sos entamos parten del sieglu X y que supon pa Uviéu un gran “patrimoniu históricu cultural que nun puede sumir”. Coles mires de sopelexar esta parte esencial de la memoria d’Uviéu ente la población, el xeógrafu Toño Güerta diseñó trés xornaes nes que se van amosar les últimes meyores del estudiu históricu d’esta actividá: Tanto’l xueves como’l vienres el Cibercentru de la Lila va acoyer delles charres  al cargu d’historiadores y arquéologos, amás d’una mesa redonda y la proyección d’un documental realizaáu por Dislok2. El sábadu, l’actividá va treslladar al centru social de Faru onde se va apurrir el V Premiu Barbón. El programa d’actividaes (toes d’accesu llibre y gratuitu) puede consultase equí.

  Categories: