Fame Poétika representó a Asturies nel Festival Internacional Kerouac de Vigo

Fame Poétika representó a Asturies nel Festival Internacional Kerouac de Vigo
24 ochobre 14:13 2017 Imprimir

La poesía n’asturianu tuvo presente nel Festival Internacional Kerouac de Vigo con Fame Poétika, que celebró esta selmana pasada la so 7a edición cola idea d’inundar la ciudá gallega de poesía.

El colectivu Fame Poétika representó a la lliteratura asturiana, cola presencia de los poetes Diego Solís, Raquel F. Menéndez ya Inaciu Galán. Amás, tuvo presente l’escritor y profesor de lliteratura de la Universidá d’Uviéu, Antón García.

Los poetes de Fame Poétika participaron nun espectáculu lliterariu xunto a otres propuestes poétiques y musicales de distintos países, el sábadu, nel espaciu La Fiesta de los Maniquíes. Ellí abrieron la so participación con una acción reivindicativa cola que quixeron recordar los daños causaos pol fueu n’Asturies y en Galiza. Inaciu Galán dio llectura a un testu en gallegu alredor d’esta cuestión. Darréu Diego Solís faló del llabor de Fame Poétika averando la poesía a ámbitos populares. Depués vieno la llectura de la obra de los trés poetes y una charra curtia na que s’esplicó la situación de la llingua asturiana.

Nesti Festival Internacional Kerouac inauguróse’l “Muro dxs poetas” na cai Londres, xunto al Muséu d’Arte Contemporáneu. Nesta muria, formada por azulexos con versos de poemes, hai representación de la lliteratura n’asturianu, con un versu de Raquel F. Menéndez.  Amás, Inaciu Galán y Diego Solís participaron na actividá “poemóvil”, na que dellos poetes convidaos al festival percorrieron la ciudá nun coche, recitando los sos versos al traviés d’un sistema móvil de megafonía instaláu nel coche.

  Categories:
Loading Facebook Comments ...