Portada Conceyos Fame Poétika presenta’l poemariu “Hijas ilegítimas” del cantautor Alfredo González

Fame Poétika presenta’l poemariu “Hijas ilegítimas” del cantautor Alfredo González

by redacción asturnews

El colectivu de poesía Fame Poétika visita Uviéu acompañáu del cantautor Alfredo González, col envís de presentar “Hijas ilegítimas”, primer poemariu del músicu. Dicha presentación dirá precedida d’una timba poética, ye decir, un micro abiertu a tola xente que quiera averase a lleer los sos poemes.

El llocal qu’escoyeren pal actu ye la sala de conciertos “La Salvaje”  (C/ Martínez Vigil, 9), sala que nos últimos años ta convirtiéndose nuna referencia pa esfrutar de música en direutu. En pallabres del encargáu de la presentación Diego Solís: “Creemos que llevar una presentación y un recital de poesía a una sala de conciertos ye bien representativo del llabor del colectivu y lo que representa anguaño pal país. Les coses tan camudando: igual, por una vez, nun son tan malos tiempos pa la llírica”.

La timba poética, qu’entamará una vez acabada la presentación el breve conciertu, tará coordinada pol poeta Andrés Treceño y podrán apuntase toles persones que lo deseen, especialmente les que quieran lleer testos propios, anque esto nun ye fundamental. Como ye vezu, nesti tipu d’eventos, agradécense les participaciones ya seya de músicos, poetes o artistes de tou tipu que quieran acercase a esti puntu d’alcuentru pal arte en direutu.

Pa los que quieran apuntase, pueden comunicalo al travíes de les sos plataformes y redes sociales (Facebook, Twitter, Instagram, Gmail…), toes col nome de colectivu: Fame Poétika. O tamién pueden acutar sitiu, diendo direutamente al llocal, un poco enantes de les 19 hores, hora d’entamu de la presentación.

Tamién te podria gustar