Portada Mocedá Fai! Va celebrar un conciertu escontra la “Ordenanza Cívica de Convivencia Ciudadana” d’Uviéu

Fai! Va celebrar un conciertu escontra la “Ordenanza Cívica de Convivencia Ciudadana” d’Uviéu

by asturnet

La organización d’esquierda soberanista celebrará esti vienres 27 en La Calleja la Ciega (Cai Martínez Vixil, 14) d’Uviéu un conciertu reivindicativu como reaición énte la más que posible aprobación de la “Ordenanza Cívica de Convivencia Ciudadana” del conceyu carbayón, que según la organización “reprimirá al traviés de multes d’hasta 3.000€ la llibertá d’espresión nes cais d’Uviéu, acosará la mendicidá y a los “ensin papeles” y torgará les formes alternatives d’ociu mozu na capital d’Asturies”.

El conciertu entamará a les 19.00 hores y cuntará cola participación d’Adizión Etílika, grupu de Hardcore de La Pola (L.lena) y Vinagre de Sidra (Punk de Xixón), xunto con un grupu convidáu. La entrada va ser de 3€ y durante’l conciertu desplicaráse en qué consiste esta ordenanza y “les consecuencies qu’en forma de represión de les llibertaes va trayer consigo”.

De la mesma manera, Fai! vien de consiguir qu’una propuesta de resolución relativa a la ordenanza d’esta organización fore aprobada nel Conseyu de la Mocedá d’Uviéu. Nella, esplicitábase que’l CMU va pidir una entrevista cola conceyala responsable de la “Seguridá ciudadana” pa treslladá-y les postures del Conseyu énte les normes que considere “represores” del Ayuntamientu. Amás, el CMU y la so permanente comprometíense a facer un actu “artísticu-reivindicativ” nel que se va pintar la fachada del Conseyu “p’amosar la so refuga a la metodoloxía de les multes y les porres que Gabino quier pa Uviéu”.

Tamién te podria gustar