Portada Opinión Fai! énte les declaraciones del Presidente del Conseyu d’Estudiantes de la Universidá

Fai! énte les declaraciones del Presidente del Conseyu d’Estudiantes de la Universidá

by asturnet

La organización, presente nel Claustru de la Universidá calificá de “despropósitu” les declaraciones del Presidente del Conseyu d’Estudiantes , Gonzalo Asenjo, que, nun periódicu de tirada asturiana, denunciaba’l domingu 14 “manipulación y llucha política” frente al procesu de Bolonia y les protestes que ta xenerando la so implantación nes universidaes.

Asinamesmo, el Presidente del Conseyu de tolos y toles estudiantes de la universidá asturiana afirma que “la idea de Bolonia ye bona y necesaria”, condicionando’l so preste a la reforma del Espaciu Europeu si “el procesu se fai colos estudiantes y non al marxe d’ellos”. Amás, afita que nos grupos d’oposición al plan de Bolonia “tan meciendose problemátiques sociales colos problemes que plantía’l procesu, buscando la xenesis d’estos últimos nos primeros”.

Énte les declaraciones de Gonzalo Asenjo, queremos manifestar lo siguiente:

1- El procesu de Bolonia, tal como ta anguaño diseñáu, supón un retrocesu y un pasu atrás na reivindicación d’una enseñanza pública y de calidá: una enseñanza onde se van dir multiplicando los gastos de matrícula y estudiu, onde se prepara a los estudiantes como mercancía de les empreses, qu’entren en xuegu ensin escrúpulos, y non como persones, que propón “beques prestamos”, que zarra les sos puertes a quien tamien trabaya, con evaluaciones contínues y ampliación de creitos…

2- Esti contestu de reforma universitaria nun pue dexar de llau la situación global económica y social na que tamos inmersos. Les recientes propuestes de les 65 hores llaborales selmanales, la directiva Bolkestein qu’abre la puerta al llibre-mercáu más sangrín, son les esperiencies futures que van tener que vivir les y los graduaos/es que salgan de les universidaes. Nesti sen y ensin dulda, la reforma del Espaciu Europeu d’Educación Superior ye la espresión d’estes polítiques agresives “neocón” que se pretenden aplicar nel campu de la enseñanza, anque’l Presidente del Conseyu d’Estudiantes d’Aula Joven quiera mirar pa otru llau y desvincular, con argumentos mui asemeyaos a los que’l Secretariu d’Estáu del PSOE usa, esta reforma del contestu global del capitalismu xabaz nel que nos atopamos.

3- Nesti procesu, lo mesmo a nivel global como nel casu de la Universidá d’Uvieu, los y les estudiantes nun tan siendo respetaes/os nin consultaes/os n’absoluto. La participación del sector estudiantil nel diseñu de les nueves titulaciones, nun falemos yá del modelu integral de la reforma, ye inesistente dafechu. La situación ye tan grave que, non sólo nun se ta cuntando cola nuestra opinión, sinón qu’a la gran mayoría d’esti sector nin siquiera se la ta informando acerca del cambiu y les consecuencies privatizadores que va tener. Resulta, asina, irónico que’l propiu Presidende del Conseyu d’Estudiantes dea’l so apoyu condicionándolu a una invisible participación estudiantil que va tener mui difícil xustificar.

4- Dende Fai! desiximos, en primer llugar, a les autoridaes universitaries, qu’entamen una campaña d’información real de los cambios d’esta reforma universitaria y que, de siguío, promuevan debates que culminen con asamblees vinculantes onde los y les estudiantes tengan un papel al más altu nivel pa decidir na formación del so futuru y del de los y les que vienen detrás. Al tiempu, animamos a tola comunidá educativa (profesores, PAS y estudiantes) a informáse, organizáse y plantar cara unitariamente a la privatización d’un sector que cada vegada ta sufriendo más y más agresiones a la so autonomía y calidá.

Tamién te podria gustar